Era arqueologia americana encara discutís aué se siguec possible qu’es umans arribèssen ad aguest subcontinent abans dera epòca de Clovis – çò hè 13.200 ans-. Era majoritat des arqueològs defenen qu’aquerò ei pas possible mès tostemps i an agut votzes que didien quiòc.
Ara, ua equipa arqueologica der Institut de Recèrca d’Aucilla, en Florida, a confirmat qu’uns uassi e ua banha de mastodont trapats en Page-Ladson, an ua edat de 14.550 ans, çò ei 1.500 ans abans dera epòca de Clovis.
Era descobèrta a estat considerada de grana importància pr’amor que pòqui arqueològs americani pensauen que i auien auut umans en America abans dera aperada epòca de Clovis – pes utís de pèira trapats en aguesta vila d’Arizòna-. Mas ara i an pròves scientifiques e pr’aquerò aguesta pròva a nivèu arqueologic ei revolucionaria.
Eth lòc on an auut es excavacions arqueologiques, Page-Ladson, ei un lòc qu’es tròbe a 8 mètres jos era aigua en er arriu Aucilla, prèp dera vila de Tallahasee. Aciu s’i trapèren pendent es annades 80 bères ues pèires hètes per òmes e tanben ua banha de mastodont. Mes se creiguec qu’ère pas possible que siguèssen tan ancianes. E ara eth readiocarbòni demòstre qu’era edat ei 1.500 ans mes anciana que Clovis.
Ua convivència pendent milièrs d’ans
“Es marques trapades ena banha de mastodont an estat hètes claraments per èsters umans – çò confirmèc Daniel Fisher – coautor der estudi -. Aquerò vò díder qu’era nòsta espècia ja auie arribat a Florida hè 14.550 ans, fòrça abans dera arribada dera populacion aperada de Clovis”.
Pr’aquerò era equipa arqueologica confirme qu’era teoria qu’era dintrada der òme en eth continent american provoquèc ua extincion rapida e totala dera megafauna non serie vertat pr’amor qu’es umans e era grana fauna aurien conviscut pendent mes de 2.000 ans.
Segontes aguesta equipa, es umans aurien deishat marques ena banha de mastodont pr’amor que, o ben volien auer era carn que i auie o ben pr’amor que volien hèr armes damb er evòri dera banha”.
Christian Andreu
