Istoricament, a l’Edat Mejana i a divèrses factors que son causa dirècta del sieu començament. Un d’eles es la casuda de l’Empèri Roman e l’arribada de milièrs de refugiats barbars qu’an coma origina lo nòrd europèu en una crisi sociala e umanitària sens precedents. Mas ara la sciéncia a descobèrt que l’erupcion de dos volcans foguèt lo començament d’un cambi climatic que poiriá ben aver accelerat aquesta crisi. Après las erupcions, Euròpa aviá cambiat tant que l’Edat Antica aviá laissat pas a l’Edat Mejana.
Es una descobèrta estonanta que balha supòrt a las teorias scientificas que confirman que los grands cambiaments climatics qu’a patit l’umanitat an coma causa un cambi en lo clima de la planeta. Aital o prepausan ara divèrses climatològs de las universitats de Kiel e Oslo. L’estudi, publicat en lo jornal Climatic Change, confirma que pendent los ans 536 e 540 doas erupcions volcanicas aurián fach baissar las temperaturas mondialas entre 1 e 3 grads. Aquò seriá estat causa d’una granda crisi sociala e politica a l’Euròpa de l’Emperaire Justinian.
Tròp d’evidèncias o confirman
La còla qu’a realizat aqueste estudi a estudiat divèrsas cronicas contemporanèas, divèrses estudis arqueologics e tanben evidéncias fisicas basadas en nòvas donadas del glaç de Groenlàndia e l’Antartida. Lo nívol d’aerosòl que cobriguèt l’estratosfèra entre 536 e 540 foguèt “l’erupcion mai granda que i a agut jamai dins l’emisfèri nòrd pendent los darrièrs 1.500 ans”.
La baissada de temperaturas provocada per aqueste nívol que cobriguèt la Mediterrània “provoquèt divèrsas crisis socialas aital coma la primièra plaga pandemica que i aguèt en Euròpa e que comencèt l’an 541- çò diguèt Matthew Toohey, del Centre de Recèrca Oceanica de Kiel -. Foguèt, de segur, lo decènni mai fred en los darrièrs 2.000 ans e regions coma Escandinàvia patiguèron e plan aquestas baissas temperaturas. I aguèt fred e fam e comencèron a se mòure las nacions europèas”.
Aqueste estudi confirma que las erupcions volcanicas dels ans 536/540 aurián doncas provocat un grand impacte en las societats de l’epòca e lo començament de l’Edat Mejana. Mas ara cal determinar quins foguèron los volcans que o provoquèron. I an divèrses candidats en America del Nòrd, America Centrala o Indonesia mas cal aver mai de donadas per o poder precisar.
Christian Andreu
