Se ua causa comènça d’estar segura ei que los nivèus actuaus de torisme a la planeta son de mei en mei perilhóses entà l’environament. Ne hè pas guaire, qu’estó conegut que lo Mont Fuji, a Japon, que demoraré barrat peus toristas. Tanben a la region que i a a l’entorn deu mont, pr’amor que i a tans toristas que los abitants locaus pòden pas mei, e tanben ne cau pas cambiar un environament segur e san entà un aute plen de lordèras deus toristas. Mes que tanben i a autes lòcs de la planeta que tanben vòlen arrestar aquera creishença deus toristas pertot.
Atau, aprés qu’estó conegut que a l’isla asiatica de Bali lo governament confirmè que non i poirén arribar tans toristas coma abans pr’amor que i a de mei en mei lordèras a l’isla e la causa principau que’n son los toristas. E, donc, se se vòu conservar aqueth environament de filme de l’isla de Bali, solament se pòt har dab mensh de toristas. Adara tanben un país europèu que poiré adoptar ua legislacion navèra tanben entà barrar l’accés deus toristas ad aqueth país.
Tròp toristas e tròp lordèras
Lo país qu’ei Croàcia e lo governament d’ailà que demandarà ua taxa environamentau a tots los toristas qu’arribaràn ad aqueth país. La causa oficiau qu’ei que los toristas an pas nada de respècte entà l’environament de Croàcia e l’ecosistèma locau qu’ei en dangèr. Entà ensajar d’ac sauvar, los croates que causín mei d’argent a pagar entaus toristas. Dab aqueth argent se poirá lutar mélher contra las lordèras que dèishan de mei en mei los toristas dens aqueth estat europèu. Que’s pensa que la navèra taxa toristica croata poiré començar l’an que vien, en 2025.
L’ahar que comencè hè annadas, e començèt d’estar grèva quan Croàcia comencè de recéber mei de 20 milions de toristas de faiçon annau. Quan aquò se debanè la pression umana sus las infrastructuras mes tanben sus l’environament que vienó grèu. E qu’estó alavetz quan lo governament croate causí har quauquarren se’s volèva sauvar la natura d’aqueth país. E la circulacion de vaishèths que serà un deus prumèrs efèits, pr’amor que hasèva annadas qu’ac calèva regularizar.
La celèbra taxa toristica n’ei pas navèra en Euròpa. Dens mantua vila occitana qu’ei dejà pagada. En vilas catalanas granas pròchas coma Barcelona dejà hè annadas que los toristas pagan dinc a 20 euros per dia se vòlen visitar aquera polidòta vila catalana. Mes la taxa toristica croata aura coma tòca sauvar dirèctament l’environament d’aqueth país.
Se’s coneish quans abitants a un país coma Croàcia, que solament ne a 4 milions, e se descobreish que cada annada i arrivan mei de 20 milions de toristas, qu’ei normau compréner que i a tròp toristas e que pòden provocar de damnatges a l’environament. Entà un país coma Croàcia resòlver aquò entraïna un gran besonh d’argent e dilhèu atau se poiré ajudar a desvolopar projèctes naturaus positius entà la natura croata.
Lo torisme qu’ei benvengut en Croàcia pr’amor que dab aquesth i arriba hèra argent. Mes aprés, que i a ua fauta grana d’argent governamentau entà protegir l’environament. Despuish l’an que vien, que seràn los toristas que pagaràn aqueth argent entà protegir la natura croata.
Totun, que i a tanben daubuns problèmas grèus, coma los canaus que son pas connectats au sistèma public e que i a hèra lordèras qu’acaban a la mar. Los vaishèths de toristas tanben hèn aquò. “Daubuas vilas de la còsta oèst d’Istria coma Porec o Rovinj qu’an besonh d’ua modernizacion rapida deu sistèma d’aigas se volem protegir la natura, dit Neven Iveša, de l’Universitat de Pula”.
La mar e los fluvis croates que pateishen ua contaminacion marina que comença de provocar de damnatge a la fauna e flòra locaus de la Mar Adriatica. Sustot pr’amor deu torisme nautic. En mei d’aquò, los medishs vaishèths que mièn en Croàcia ua espècia envasiva, un organisme predator que minja tot lo plancton e zooplancton deu sistèma locau. E aquò, segon mantun cercaire, shens torisme non passaré. Pr’açò cau arrestar aquera hèra hauta chifra de toristas se los abitants deu país vòlen sauvar l’environament. Que cau regularizar la circulacion aqüatica de la region, sustot en Dubrovnik.
Los panèus demandan respècte entà la natura e començan de sortir drin pertot e que son adreçats aus toristas. E tanben i aurà mei iniciativas locaus entà ensajar d’arrivar a aver un torisme regionau equilibrat dab lo respècte entà la natura. Aquera qu’ei la tòca que i a, despuish adara de lo governament croate. E tanben de tots los abitants d’aqueth beròi país europèu.
La Redaccion
Fotografia principau : Ian Gratton/CC
