Chomolangma, valent a dire lo mont Everest, es un glacièr e es plan sensible al cambiament climatic actual, mas pas solament aqueste glacièr. Tanben o son totes los glacièrs de la region de Dudh Kosi, en Nepal. Un estudi fach pel Centre Internacional de Desvolopament Integrat de la Montanha, a Katmandó, confirma que las emissions de gases d’efièch de sèrra poirián far fòrça mal a aquesta montanha d’Imalaia.
Per far l’estudi s’es utilizat un modèl de glacièrs per saber cossí se poirián desvolopar fins a l’an 2100. Joseph Shea, director de l’estudi, e la còla scientifica que l’a realizat, an pogut confirmar que lo glaç de la region se poiriá reduire d’entre un 70% e un 90% ongan.
La resulta finala dependriá de la quantitat d’emissions de gases d’efièch de sèrra que i aguèsse sus la planeta pendent las pròchas annadas. Solament aquò poiriá far variar mai o mens la temperatura, la nèu e las pluèjas de la region.
“L’estudi ditz que los glacièrs nepaleses son fòrça mai sensibles al cambiament de temperatura mondial que non o pensàvem – çò diguèt Shea -. Lo cambiament climatic provòca de cambiaments de temperatura e de precipitacions qu’ajudan pas a manténer lo glaç”.
Una reduccion de las pluèjas
L’estudi, publicat dins lo jornal Cryosphere, preditz que lo cambiament climatic transformarà las precipitacions de nèu e pluèja dins las annadas criticas, ont i a mai de glacièrs. Tot aquò poiriá far descréisser lo glaç e expausar encara mai la nèu e lo glaç d’uèi lo jorn a la lor fonda.
“Los glacièrs de l’airal de Dudh Kosi menan d’aiga al flume Kosi e los cambiaments que i auràn – çò confirmèt Shea – reduiràn tanben lor cabal”.
Las consequéncias de la reduccion dels glacièrs de la region seràn nautas per l’obtencion d’aiga, l’agricultura e tanben la generacion d’electricitat. D’en primièr i auriá mai d’aiga pr’amor d’una mai granda fonda mas puèi, çò dison aquestes scientifics, i auriá mens d’aiga pendent l’estiu e l’impacte sus la populacion de la region seriá fòrça grand pr’amor que las pluèjas de la monson son encara luènh.
En mai d’aquò, una pèrda de glacièrs induiriá una mendre formacion de lacs. I aurián mai d’avalancas e de tèrratrems mas tanben mai d’aigats e inondacions.
La Redaccion
Aqueste article serà tanben publicat dins Jornalet , lo primièr quotidian en linha de lenga occitana, amb lo qual Sapiéncia a un acòrdi de cooperacion.
