Qué son los idrozoaris ? Los idrozoaris que son cnidaris parièrs aus anemònas de mar. Cada especimèn a un cors en fòrma de tube e tanben qu’an un anèth de tentacules que forman ua sòrta de flor.
Qualcunas espècias d’idrozoaris que forman colonias dab polips e atau crean çò que pòt estar considerat un superanimal. Aqueras colonias que’s difusan pertot sus tota sòrta de superficia marina solida. Autas espècias, com la fisalia e la velelha que flòtan a la mar liuras e que demoran pr’amor d’açò, mes près de las medusas.
Colonies de petits polips
Un idrozoari qu’ei compausat d’ua colonia de petits polips que hèn dinc a 5 mm de hautor e que demoran tots amassa. Aquò de mei comun qu’ei los trobar ligats a ua ròca, d’algas o enqüèra la clòsca d’un animau màger. Que serà acerà on creisheràn e que’s desvoloparàn a la mar. Sovent son coneishuts dab lo nom de cipreses de mar.
Que i a hèra idrozoaris aus lòcs mei protegits. Que son colonias entièras que pòden semblar briozoaris mes los lors tentacules ne son pas cobèrts per hius. Las colonias mei comunas d’idrozoaris que son nommadas obèlias. Qualcunas espècias que demoran a l’Ocean Atlantic mes que tanben n’i a d’autas que demoran a la mar Mediterranèa. Que pòden arribar aus 30 cm de hautor e qu’an fòrma de zigazaga. Autes que son parièrs a petits arbos marins.
Cada colonia d’abèlias a dus tipes diferents de polips. Los idrozoaris que minjan dab los lors polips e que us pòden retirar tostemps quan son miaçats. Lo polip qu’utiliza los tentacules urticàris entà caçar petits animaus que i a dens lo plancton. Lo minjar que serà puish balhat a tots los membres de la colonia de faiçon parièra.
Los polips reproductors, totun, non an tentacules. Un polip crearà ua medusa petita que flotarà a l’aiga e acerà que liurarà gametas mascles e femèlhas. L’ueu fecundat que produsirà ua larva petita que flotarà dens lo plancton e que lèu demorarà sus ua ròca entà se transformar en polip. Cadun d’aqueths balharà neishença a ua replica petita d’eth medish e un polip que pòt vàder mei tard ua colonia entièra d’idrozoaris.
Las idras son idrozoaris d’aiga dolça. Que’s neureishen de petits animaus marins, dont puç d’aiga que capturan dab los lors tentacules. Daubuns tròçes que’s separan de l’animau pair entà formar d’autes individús. La lor reproduccion donc ei asexuau, mes tanben que pòden se reproduïre de faiçon sexuau se cau.
Qualcunes idrozoaris que semblan coralh. Cada espècia qu’ei cobèrta dab ua capa calcaria plan dura e d’un anèth de tentacules urticàris. Se l’òmi lo trapa pòt recéber un nhac deu celèbre Coralh de Huec. Lo coralh de huec fòrma sovent la part mei superiora deus escuèlhs de coralh. La color qu’ei blanca, jauna o iranja e sovent que podem pensar qu’ei coralh mes en vertat que son colonias d’ua espècia d’idrozoari ; lo coralh de huec.
Aquesta cronica suu Ràdio país: https://soundcloud.com/radio-pais/natura-deus-animaus-plan-singulars
