Los jutges europèus deu Tribunau de Justícia de l’Union Europèa qu’an tornat a defénder la caça deu lop enqüèra que sia entà har un contròle de la populacion de lops deu temps que l’espècia sia miaçada. Los jutges europèus que barrèn atau ua demanda deu governament austrian qui demandava si’s podèva tuar un lop de Tiròl qui auré tuat, segon qualcunes, mei de 20 aulhas.
Atau, los jutges europèus que considèran que l’espècia ei protegida pertot a tots los nivèus, pr’amor que pateish ua situacion globau en Euròpa de miaça e, segontes los medeishes jutges, l’excepcion ad aquera defensa solament pòt arribar se ei entà arrestar ua màger pèrta economica e l’espècia n’ei pas miaçada, çò que’s debana pas en Àustria, çò digón los jutges.
Tot comencè ne hè pas guaire, quan divèrsas associacions ecologistas demandèn a la justícia de l’estat austrian de Tiròl se aqueth lop podia pas estar aucit, pr’amor que l’espècia èra protegida. Los jutges de Tiròl qu’envièn la causa a Viena, e aquesta que demandè au Tribunau de Justícia de l’Union Europèa se èra atau.
L’espècia pòt pas estar miaçada
Atau, los jutges europèus que confirmèn que solament i podèvan aver excepcions a la caça deu lop, per exemple, se i avèvan duas condicions, la prumèra qu’èra qu’ac calèva demandar dab la sola tòca d’arrestar mei d’atacas au neurissatge. E la segonda èra que l’espècia devè pas estar miaçada en Àustria, çò que’s debane pas uei. Pr’açò que tanben confirmèn que lo lop pòt pas estar sacrificat se i a ua alternativa bona entà sauvar lo lop.
Uei en Euròpa, que i a, haut o baish, 20.000 lops . En 2022 l’Union Europèa que votè protegir l’espècia, mes en 2023 la Comission Europèa que demandè ua mendre proteccion entà l’espècia e tanben mei excepcions a la soa caça. E las associacions ecologistas de tota l’Union Europèa adara critican aquera possibla refòrma legau de proteccion deu lop, qu’ei pas enqüèra reau.
“Que cau poder víver dab los lops, dit Carlos Javier Duran, deu CIEMAT, ne’s pòt pas reformar la lei entà protegir mensh l’espècia. Que pòden estar usats cans entà protegir las aulhas e las barrar pendent la nueit e atau arrestar las atacas deus lops. En mei d’aquò, que i a ajudas economicas que jamei son usadas per las administracions”.
Ne hè pas guaire, en 2019, la justícia europèa que tanben que defendò la caça deu lop en Finlàndia pr’amor qu’acerà l’espècia tanben ei miaçada. N’èra pas important se i avèvan atacas deus lops au neurissatge, pr’amor que tostemps i avèva alternativas a la soa caça.
A l’estat espanhòu, per contra, e aprés duas annadas e mieja de proteccion legau deu lop, lo parlament espanhòu que poiré rebaishar lo gras de proteccion deu lop, pr’amor qu’ac demandè la dreta e los fascistas. E los ecologistas que son inquièts pr’amor que lo lop, a l’estat espanhòu, que poiré deishar d’estar autan protegit. Urosament, enqüèra i a justícia a nivèu europèu.
Aquesta cronica suu Ràdio País: https://soundcloud.com/radio-pais/natura-lue-que-defendo-la-caca-totau-deu-lop?in=radio-pais/sets/natura
