De nòus escavaments arqueologics dels darrièrs tempses soslinhan que los Pirenèus foguèron un refugi neandertalian ara fa 160.000 ans. Aital foguèt confirmat a los escavaments de Coupe-Gorge, Montmaurin e Nauta Garona. Son de luòcs dels Pirenèus qu’aufriguèron de rèstas umanas a mai de fauna locala (de iènas). E balhan una nòva vision sus aquelas montanhas ara fa 160.000 ans.
Aqueles escavaments foguèron realizats per una còla d’arqueològs dirigits per Amélie Vialet e lo Centre de Recèrca de Tautavuèlh (Talteüll), a mai del Musèu de Tolosa. E las resultas son plan singularas. Car demòstran la primièra preséncia umana en aquel airal (los Pirenèus) dempuèi fa almens 160.000 annadas.
Las rèstas nendertalianas trobadas èran prèp de rèstas de fauna locala ( de caval, de rangièr, d’ors, de rinocèros,de bisont e de cèrvi) menat ailà per de iènas. Justament pr’açò los cercaires esperavan pas i trapar de rèstas umanas. E la sieuna tròba foguèt estonanta, tanben pels cercaires. En mai d’aquò, la preséncia umana a la region es estada plan malaisida de trobar, fins ara.
De secuéncias temporalas
Segon la meteissa Vialet la descobèrta d’aquelas rèstas en 2022 confirma que i aguèt una ocupacion umana temporala e abans lo luòc foguèt ocupat per d’animals (mai que mai carnivòrs). Pr’amor de l’importància de la descobèrta los cercaires confirmèron que cal contunhar l’escavament.
Ara, lo problèma pus important es datar aqueles osses. Cal usar lo metòde de l’urani pr’amor que son plan vielhas e se pòt pas far amb lo metòde del carbòni 14. Foguèron trobats dos tròçes d’os e una dent. Tanben divèrses espleches neandertalians de caça. Mas ara foguèt trobat un cubit neandertalian que poiriá apertenir a l’òme lo pus ancian dels Pirenèus, un neandertalian. E tanben cal demostrar que l’os aperten a un neandertalian.
Una region refugi
Los darrièrs escavaments doncas confirmèron tanben la preséncia umana als Pireneùs, mai que mAI las rèstas trobadas a Montmaurin. Segon Vialet ja èra sospechat qu’en aquel airal i aguèron d’espècias ominidas. E pr’amor d’aquò lo luòc foguèt un refugi pels umans de desparièras epòcas. Qualcunas rèstas fan pensar en antropofagia.
Per la paleoantropològa las recentas descobèrtas son plan importantas pr’amor qu’ara ja se pòt dire que los Pirenèus foguèron un refugi pels neandertalians, mai que mai en Montmaurin (Gasconha). Los escavaments contunharàn pendent tota la sason d’estiu per assajar de confirmar cossí visquèron aqueles ancessors de nòstra espècia als Pireneùs.
La Redaccion
