Un nòu estudi balha nòvas donadas sus la populacion d’arbres al mond. Segon aqueste i a justament 60.065 espècias d’arbres a la planeta. L’estudi confirmèt la riquesa del mond vegetal a la Tèrra e foguèt realizat per mai de 500 organizacions diferentas.
Jardins Botanics per la Conservacion Internacionala (BGCI en anglés) es l’organizacion que faguèt lo nòu estudi en tot utilizar de donadas de mai de 500 organizacions membres. Amb aquò volguèron identificar d’espècias brica comunas e tanben las espècias que son en dangièr. Qualqu’unas, dison, necessitan d’actuacions urgentas per èsser pas escantidas lèu.
L’estudi, publicat al Journal of Sustainable Forestry, confirmèt divèrsas donadas estonantas. Entre aquestas que Brasil es la nacion qu’a un nombre mai grand d’espècias d’arbres: amb un total de 8.175 desparièras espècias.
E la region que n’a mens es America del Nòrd, que n’a solament mens de 1.400. solament las regions polaras, qu’an pas arbres, n’an mens. De mai, un 58% de las espècias d’arbres estudiadas se tròban solament en un país e aquò las fa fòrça mai vulnerablas a l’extincion, la desforestacion, d’episòdis environamentals extrèms o l’activitat umana.
Mai de 300 espècias en dangièr
De las mai de 60.000 espècias identificadas a la planeta tota, prèp de 300 son estades classadas en un dangièr real d’extincion pr’amor que solament demoran 50 especimèns o mens a la natura. Maugrat aquò, l’organizacion BGCI a volgut confirmar que conéisser lo nombre exacte d’espècias d’arbres a la planeta es un trabalh impossible de far. Solament n’aver una idèa e pro.
“L’estudi es pro realista pr’amor qu’avèm agut l’ajuda de mai de 500 institucions botanicas – çò diguèt lo secretari general de BGCI Paul Smith -. La digitalizacion d’aquestas donadas es lo capítol final d’un trabalh d’identificacion d’espècias d’arbres qu’a demorat sègles”.
Al delà, l’estudi a situat la geolocalizacion coma una ajuda indispensable per trobar nòvas espècias als botanics. Amb aquò se pòt ja crear plans de conservacion dempuèi un primièr moment, çò diguèron los expèrts de BGCI. E aital se pòt actuar melhor en las espècias mai fragilas.
Coma exemple, BGCI parlèt d’una espècia d’arbre que foguèt trobada solament en Tanzania: Karomia gigas. En 2016 una còla de scientifics la descobriguèt en una region luenhana d’aquel país. E solament i aviá una populacion de 6 arbres. Creèron una còla per susvelhar los arbres e poder aver aital semenças. Amb elas vòlon la reintrodusir en autras regions per poder la sauvar.
Totun, aquesta organizacion volgèut confirmar que la chifra de mai de 60.000 espècias que i a uèi a la planeta poiriá créisser dempuèi ara en mai de 2.000 espècias cada an e pr’aquò es un listat qu’es pas definitiu. Una tòca qu’esperam que pòscan aténher.
La Redaccion
