I aviá tempèsta a Genèva. Èra l’an 1816 e un grop d’amics s’aviá amassat a l’ostal nomenat Villa Diodati, un lòc fòrça conegut a l’epòca pr’amor qu’escrivans coma John Milton, Rousseau e Voltaire i avián viscut. Sens o voler, la reunion balhariá naissença a un nòu genre literari mondial: lo terror romantic.
A l’ostal i a John William Polidori (1795-1821), doctor, amb los frairs Shelley, Percey e Mary, Lord Byron, Matthew Lewis e la comtessa Potocka. Legisson un roman de Polidori sonat Phantasmagoria (una antologia de legendas alemandas de fantaumas) e decidisson totes d’escriure una istòria de terror. Solament dos del grop o faran; Polidori e Mary Shelley.
Aquesta finiriá un libre qu’amb lo temps serà conegut a tota la planeta: Frankenstein. Foguèt un roman revolucionari en una epòca ont los obrièrs cremavan las usinas per paur a las maquinas e la modernitat. Una epòca de paur e supersticion qu’èra l’inici del mond que coneissèm uèi lo jorn; la modernitat.
Lo doctor Polidori tanben finirà un roman: The Vampire (Lo Vampir), utilizat coma inspiracion per un sens nombre d’escrivans posterior. Ja en 1851 Alexandre Dumas escriurà Lo Vampir e en 1872 Sheridan La Fanu escriurà Carmilla. Abans Edgar Allan Poe ja aviá escrit Berenice e, fin finala, una escrivan nomenat Bram Stoker desvolopèt una istòria de terror vampirica coneguda mai tard coma Dracula.
Incredulitat davant los fachs
La istòria del Vampir, escrita per Polidori, parla d’un jove, Aubrey, que coneis Lord Ruthven. Ambedós viatjan a Roma, ont començan a aparèisser de femnas mòrtas sens sang. Non cal dire qu’Aubrey non relacionarà Lord Ruthven amb aquestas mòrts. Après lo laissar e viatjar solet a Grècia, la reaparicion de Lord Ruthven en aqueste país tanben es seguida per una onda de mòrts misteriosas.
Fin finala, de lairons los atacan e aucisson Lord Ruthven. Aqueste fa jurar Aubrey de non parlar mai d’el fins passat un an e un jorn.
Quan Aubrey tòrna a Londres tròba que Lord Ruthven es un autre còp viu e qu’es vòl maridar amb la sieuna sòr. Morirà d’una malautia dels nèrvis pr’amor que non pòt parlar sus Lord Ruthven.
Aqueste, fin finala, se maridarà e la sòr d’Aubrey morirà tanben la meteissa nuèch de nòças: los umans non creson en vampirs e Lord Ruthven pòt aital aucir e aucir sens fin: Coma lo mond actua; degun vòl pas creire e los Lords Ruthven d’uèi lo jorn aucisson e aucisson. D’aquò ja fa, uèi, 200 ans.
Christian Andreu
