La revista eLife confirma que los virus son un factor plan important e de menaires de l’evolucion umana. Per o poder assegurar, una còla scientifica a realizat una analisi de milièrs de donadas per agachar quina es l’influéncia dels virus en l’evolucion umana aital coma en la d’autres mamifèrs. Lo resultat, pro estonant, confirma que prèp del 30% de las adaptacions proteinicas patidas per d’umans après la lor divergéncia amb los chimpanzés es estada provocada per de virus.
Aital, aqueste nòu estudi soslinha que quand i a un cambi environamental las espècias tanben an de patir un cambi per s’i adaptar. E aquò solament arriba quand i an de mutacions en l’ADN. Maugrat qu’aquestas mutacions son fòrça pauc comunas, de còps, los èssers vius las patisson per s’adaptar melhor a l’environament. Aquesta sòrta de mutacions son conegudas coma mutacions adaptativas.
De mai, la sciéncia a pogut descobrir dempuèi l’an 2005 una granda quantitat de mutacions adaptativas dins los genòmas dels umans e d’autres mamifèrs en desparièrs lòcs de la planeta. Mas cal recercar ara quin tipe de pression environamentala o provòca. E los virus son de suspèctes essencials pr’amor que son estats totjorn presents en las interaccions amb de centenats de milièrs de proteïnas.
“Quan avèm una pandèmia o una epidèmia qu’evoluciona, la populacion que la patís o ben s’i adapta o ben desapareis.- çò diguèt David Enard, de l’Universitat d’Stanford e cap de l’estudi-. Pr’aquò avèm fach un estudi mai prigond sus las escasenças qu’an los umans de patir cambis proteïnics per causa dels virus”.
Una adaptacion proteïnica vitala
La còla qu’a realizat aqueste estudi a pogut confirmar scientificament que non solament las proteïnas immunizadas fòrça especializadas son las que patisson de cambis quand interagisson amb los virus. Tota sòrta de proteïnas patisson aqueste cambi. Aquestas son part d’un listat de 1.256 proteïnas d’un total de 9.861 possiblas candidatas. Totas elas son dins lo genòma d’umans e 24 autras espècias de mamifèrs.
Après aver aquò fach, la còla de scientifics volguèt analizar las donadas qu’avián per assajar de far una comparason entre aquestas e los virus e coma evolucionavan las primièras per rapòrt als virus. Lo resultat de l’estudi poguèt confirmar que las adaptacions de las proteïnas arriban a èsser fins a tres còps mai grandas quand son en relacion amb de virus que se non o son.
“Voliam saber en tot moment cossí es estada possible l’evolucion dels umans e d’autres mamifèrs e arribar a conéisser quina es estada la causa qu’a provocat l’evolucion – confirmèt Dmitri Petrov, de l’Universitat d’Stanford -. L’analisi ditz que la batalha contunha entre virus e proteïnas es la causa mai granda del cambi qu’avèm patit pendent l’evolucion e non solament unas paucas proteïnas que combaton las infeccions e pro”.
Aital, aquestes scientifics an pogut descobrir que totes los organismes an viscut amb de virus pendent milions d’annadas e qu’aquesta relacion es la causa mai granda de totes los cambis qu’an patit las cellulas. Los virus serián doncas la causa dels cambis que patís la cellula e pr’aquò tanben seriá logic dire que pòdon èsser la causa dels cambis evolutius que patisson aquestas per rapòrt a las condicions environamentalas.
Aqueste estudi auriá balhat un pauc mai de lum sus diverses mistèris biologics. Demest aquestes, perqué avèm evolucionat de manièra desparièra las diferentas espècias se totes avèm las meteissas foncions cellularas, coma l’ADN o la produccion de menbranas. E aqueste meteis estudi seriá lo primièr que confirma una de las causas mai grandas de l’evolucion animala.
Christian Andreu
