”STAR WARS” es una de las sagas cinematograficas mai capitadas de l’istòria del cinèma. Mas, al delà de la natura espectaclosa de las sieunas imatges, la sieuna benda sonòra o lo sieu argument, podèm detectar una certana filosofia subjacenta fòrça interessanta d’analisar.
Per començar, l’argument de basa sus l’eternala lucha entre lo Ben e lo Mal, plan ben caracterizat per la psicologia e lo comportament dels protagonistas; mas tanben la fragila linha que separa ambedós concèptes, e que podèm sasir dins qualcunes personatges, qu’inicialament èran “bons” o “positius”, mas que se daissan rossegar pel “Costat Sorn” cap al Mal, coma Anakin Skywalker, o las temptacions que patís Luke Skywalker. (Podèm far aquí una comparason evangelica amb las “temptacions”.)
En considerant pas que las trilogias dels films classics, los protagonistas respectius, Anakin, Luke o Rey, començan un viatge iniciatic, mas al contrari d’autres eròis de la literatura o del cinèma se languiràn pas de l’endrech ont avián viscut pendent tota la sieuna enfança e la debuta de sa joventut (las planetas Tatooine, las doas primièras, o Jakko, la tresena), qu’èran pas contents o se sentián pas satisfaches coma personas, pr’amor d’ocupar de posicions dins l’estructura sociala consideradas fòrça bassas dins aquel contèxt (bordièrs, aprendís, vendeira de ferralha…); se languiràn, ça que la, de qualcunas personas coma la maire Shmi o los oncles Owen Bercles e Lars.
Un long viatge
Aquel viatge los transformarà en d’autras personas, en d’eròis dins la galaxia, benlèu contra lor quita volontat iniciala o lo destin qu’avián somiat per eles meteisses –en tot cas, un destin totalament diferent de l’original–, e benlèu tornaràn pas jamai pus a las originas. Una autra idèa evidenta es la defensa del concèpte que tota persona pòt èsser preparada per aténher quin objectiu que siá, independentament de las sieunas originas, de sa formacion o de las muralhas invisiblas impausadas per qualcuna limitacion personala. Una autra valor suprèma dins aquela saga es l’amistat. Malgrat qu’existisson de ligams entre qualcunes protagonistas (benlèu podèm parlar d’una linhada galactica), lo supòrt mai determinant e efectiu que possedisson los personatges lor ven de lors amics o companhs, d’una leialtat indestructibla.
Los cavalièrs Jedi an de possedir de caracteristicas moralas e eticas determinadas, fòrça semblablas a aquelas assignadas als cavalièrs e als monges asiatics e crestians medievals. Un còde d’onor de luchar al costat del Ben, ajudar los oprimits, enganar pas ni falsificar, lo sacrifici, la leialtat cap a los camaradas çai-naut mençonada… De valors que los marrits evidentament respèctan pas.
E tanben es important lo concèpte de la “redempcion”, recuperar una persona qu’aviá casut al Costat Sorn, amb l’exemple clar d’Anakin Skywalker, d’en primièr un Jedi reconvertit en lo maissant Darth Vador (Darth Vader en la version anglesa originala), per fin finala tornar al “Costat Bon”, lo “retorn del Jedi”. Un autre concèpte es l’unitat de totes los pòbles contra la menaça de l’Empèri, sol biais de combatre contra un enemic poderós comun, amb un respècte total cap a totas las raças e espècias. S’avètz remarcat d’autras valors, podètz nos far de comentaris,… e que la Fòrça siá amb vosautres!!!
Un article de Francesc Sangar
