Los darrièrs estudis realizats pels ecològs marins an pogut assolidar que i a una guèrra dubèrta entre d’òrcas e de balenas boçudas de fa temps. Poiriá èsser que las balenas boçudas ajudèsson d’autres animals e los protegiguèsson de las atacas de las òrcas. Aquò, que se passa sovent, seriá causa d’una possible guèrra entre las doas espècias.
Aquò non seriá brica estonant pr’amor que los scientifics ja aurián observat en de balenas boçudas un comportament animal fòrça complèx. Aital, los ecològs marins an pogut confirmar de manifestacions e escambis culturals entre divèrses grops d’aquesta granda balena.
Mas fa pauc an descobèrt un autre fach fòrça estonant. Robert L. Pitman, de l’Administracion Oceanica estatsunitenca suggerís qu’aquestes cetacèus ajudan d’autres animals en tot demostrar una actitud altruista. Aquò seriá causa d’una granda enemistat entre las balenas boçudas e las òrcas pr’amor que non las laissarián caçar tranquillas.
Trobadas entre d’òrcas e de balenas boçudas ja avián estat descritas abans en divèrsas revistas scientificas, coma Nature. En 2009 aqueste meteis ecològ poguèt agachar un fach estonant: d’òrcas volián caçar una fòca en Antartida e aquesta se refugièt jos una iubarta o balena boçuda. Aquesta l’ajudèt a sortir de la mar en tot moment per assajar d’arrestar que las òrcas la cacèsson.
Dempuèi aquel moment, aquel ecològ a pogut ja observar en plusors ocasions desparièras trobadas entre d’òrcas e de balenas boçudas. Aital la revista Marine Mammal Science a publicat un assag fach per Pitman ont son descritas fins a 115 trobadas entre aquestas doas espècias de cetacèus. Las observacions son pas estadas solament fachas per aquel mas tanben per d’autres 54 scientifics marins qu’an tanben vist aquestas trobadas entre los ans 1951 e 2012.
Una guerra dubèrta entre espècias
L’assag de Pitman ditz que las òrcas, de còps, vòlon atacar de balenas boçudas pichonas per las se manjar, mas qu’aquò es un fach fòrça pauc comun pr’amor que la majoritat dels còps las atacan pas. Totun, Las iubartas inicièron en 57% dels còps las atacas a las òrcas sens cap de causa. Aquò suggeririá que son las iubartas las balenas que cercan la batalha amb d’òrcas e non pas aquestas.
De mai, en 87 % dels cases las balenas boçudas foguèron las que provoquèron de problèmas a las òrcas quand aquestas caçavan. E en la majoritat d’aquestas escasenças las balenas ataquèron pas las òrcas per assajar de sauvar los lors pichons mas per sauvar d’autras espècias animalas coma leons marins, de balenas grisas o de peisses luna.
L’assag soslinha doncas, que las balenas boçudas an pas cap benefici per aquestes fachs e qu’aquò seriá un cas clar d’altruisme vèrs d’autras espècias animalas. Al delà d’aquò se confirmariá que i a benlèu una guèrra dubèrta entre aquesta espècia de balena e las òrcas de fa plan de temps. Benlèu centenats de milièrs d’ans.
Christian Andreu
