14 de març de 2016; la naveta espaciala ExoMars laissa la Tèrra per arribar en octobre d’aqueste an a Mart. Un viatge de solament sièis meses. Dins la naveta i a pas de personas. Solament de robòts. Devon estudiar la composicion de l’atmosfèra e l’origina del metan que i a en aquesta.
Al meteis còp, la NASA vòl far un estudi sus cossí se pòt demorar sus la planeta roja. Ja i a una còla de sièis voluntaris que demòran dins un centre de solament 11 mètres de diamètre dins lo desèrt que i a als environs del volcan de Hawai Mauna Loa. L’equipa es formada per un astrobiològ francés, un fisician alemand e quatre nord-americans ( un scientific, un doctor un pilot e un arquitècte).
Causits per lor optimisme natural
Demorar dins un lòc coma aqueste non es aisit. I demoraràn fins al mes d’agost d’ongan. E devon cargar de contunh un vestit espacial. L’estudi vòl conéisser cossí son las reaccions umanas entre los voluntaris e cossí se pòt preparar un futur vòl cap a la planeta roja amb aquelas donadas.
Per o far possible, totes los voluntaris an de monitors de sòm e tanben d’activitat fisica, camisas intelligentas qu’enregistran donadas divèrsas coma lo ritme cardiac o autres. Un autre monitor enregistra amb qual parlan, en quin ton, la reaccion del cos uman e, de mai, son enregistrats per tres camèras.
Al delà d’aquò, los voluntaris an de respondre cada jorn pendent doas oras a sièis questionaris sus lor santat, lor moral e cossí van las relacions qu’an amb los autres collegas de la còla.
L’oci es malaisit. L’astrobiològ planta laituga e tomatas petitas per estudiar las cianobacterias qu’an e coma pòdon èsser utilizadas per transformar l’atmosfèra de Mart . D’autres preferisson jogar de l’ukelele pr’amor que non pòdon pas aver Internet. Solament pòdon aver corrièrs electronics après 20 minutas –aiçò es lo temps que tendriá per arribar un corrièr de la Tèrra -. Tanben an de filmes, musica, libres e pòdon far filmes d’espòrt.
Los resultats seran publicats per la NASA en 2017 e es dich que las donadas seran utilizadas per los primièrs viatges umans a la planeta roja que se faran après.
Redaccion
