COMANDAR LOS OBJÈCTES PER LA PENSADA, UEI QU’EI POSSIBLE

Quiò, uei tots los ahuecats de Sciéncia-Ficcion peu monde que pòden tirar aqueth fantasma de la lor lista. En efèit, Nataliya Kosmyna, joena ucrainesa de 25 ans, cercaira a l’Institut Nacionau de Recèrcas en Informatica e en Automatica (INRIA) de Rennes, que s’i escadó de realizar un casco capable d’arrevirar las ondas cerebraus en ordis taus objèctes conectats.

Aqueth casco d’electròdes que permet a un ordinator de captar los senhaus emés peu cervèth, mercés a la tecnica electroencefalografia, e de’us transméter a un objècte cibla : « Entà alucar ua lutz, ç’expliquè Nataliya Kosmyna, que podem per exemple pensar hèra a ua ampola. Que cau saber concentrà’s, non pas sonque pensar ad aquò.

Mes, un còp lo senhau enregistrat, l’ordinator que serà capable de l’arreconéisher». Que podem imaginar totas las aplicacions possiblas d’ua tau tecnica, mes aquera avançada tecnologica que pòt trobar d’autes maines d’aplicacion que la domotica. En efèit, tanlèu 2015, aquera gojata, lavetz doctoranta en informatica a l’universitat de Grenoble, que’ns presentè ua d’aqueras aplicacions en controlar un dròne per la pensada, çò qu’èra dejà ua petita revolucion.

Ajudar las personas de mobilitat redusida

Aquera revolucion que poderé lèu pertocar un aute maine, mei important enqüèra que la domotica o l’aeronautica. Hilha de mètge, aquera gojata que s’especializè dens l’ajuda a las personas de mobilitat redusida e lo son tribalh que’us poderé portar ua ajudar de las granas dens lo tornar de cap a l’autonomia. Qu’èra d’aulhors un deus prètzhèits de la joena cercaira : « Lo men saunei, çò ns’expliquè, qu’ei de’us ajudar de tornar trobar autonomia. Que posquin alucar la lutz, obrir la pòrta o har avançar lo lor cadierau rotlant per la pensada».

Un tribalh taus autes qui’u permetó d’obtiéner, dimèrcs passat (12/10/2016) a l’Institut Pasteur de Paris, la borsa L’Oreal-Unesco tà las Hemnas e la Sciéncia qui recompensa cada annada mantua cercaira dens mantun maine scientific. Podossim véder aquera gojata a contunhar lo son tribalh de cèrca, qui ne hè pas sonque començar e qui poderé lèu revolucionar lo noste quotidian.

*Remèsi Bòi

*Dempuèi uèi trobarètz una pichona biografia dels redactors de Sapiéncia en la seccion Qui sèm.