Maugrat Qu’ei ua notícia susprenenta ei reau: un dusau malaut d’VIH, era malautia dera SIDA, se guaric eth solet sense ajuda de medecines. Açò provoquèc era suspresa ena comunautat medica dera planeta tota e poirie daurir era pòrta a naui guariments se podem trapar com se guaric aguest malaut.
Eth malaut ei ua hemna dera ciutat d’Esperanza, en Argentina e serie eth dusau malaut d’VIH qu’a un sistèma immunologic pro fòrt entà guarir-se eth solet d’aquera terribla malautia sense era ajuda de medecines – era coneishuda terapia antiretrovirau-. Açò passèc atau, segontes diuèrsi cercaires, pr’amor qu’era hemna auie ua reserva virau que non toti es malauts d’VIH an.
“ I a un tipe de persones qu’an ua reserva virau laguens que pòt produsir mès VIH, çò diguec Xu Yu, doctor der Institut Clinic de Ragon dempús d’estudiar aguest cas. Mès tanben an un tipe de cellula assassina nomentada Cellula T que pòt aucir eth virus sense era ajuda de cap medicacion”. A mès d’aguest malaut, un aute tanben se guaric d’aguesta malautia en 2020 sense era ajuda des medecines actuaus.
Eth malaut de San Francisco
Alavetz es cercaires cerquèren per tot en es cellules deth malaut de San Francisco entà sajar de trapar eth virus deth VIH-1 mès non ne trapèren cap. Com aqueth, eth malaut d’Argentina tanpòc a cap sequéncia mès deth virus d’VIH-1 laguens. Açò segontes diuèrsi cercaires d’aquera malautia poirie daurir ua pòrta entà un nau camin medicau entà guarir toti es malauts d’VIH que non ac poden hèr per eri madeishi.
“Era resulta der estudi qu’auèm hèt confirme qu’era cellula assassina T pòt guarir ben es malauts d’aguesta malautia, çò apuntèc Yu. Se trapam com foncione aquera cellula ben podem daurir era pòrta a un nau metòde entà sauvar aqueri malauts. Çò que hèm ara ei sajar de provocar aquera immunitat en persones que ja an antiretroviraus damb un vaccin e damb era tòca de provocar era immunitat totau en aqueres persones contra era malautia”. Er estudi siguec publicat ena revista scientifica online Annals of Internal Medicine.
Era Redaccion
Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita
