NAU VIDEOCLIP DE ES PAUMS

Christian Andreu — Wed, 09 Feb 2022 17:00:27 +0000

Era musica occitana qu’ei mòda. Damb « Artz-os-Eth Balh der os », era Associacion aranesa Es Paums qu’a ja tres beròis videoclips musicaus, çò que demòstre qu’era cultura aranesa ei en tot renèisher dempús d’un long temps de silenci. En aguest videoclip Es Paums e Paoesses abòrden era hèsta d’iuèrn des Barbacans de Canejan, ua hèsta tradicionau aranesa que torne a víuer boni moments. Aguesta ei ua hèsta que vire ath torn dera figura der os, mitica en Pirenèus, e eth videoclip d’Artz (os en basco) de Es Paums, que ne vò rebrembar era sua figura pr’amor dera sua importància en mon des legendes d’aqueres montanhes. Eth videoclip dure gaireben 10 minutes.

Eth videoclip « Artz-os- Eth Balh der os » a es scènes exteriores filmades en pòble de Canejan, a mès deth parçan des Quate Lòcs e Lairissa. Es scènes interiores, totun, sigueren filmades ena glèisa de Canejan, era Casa dera Vila e en Musèu deth País de Banhères de Luishon, en estat francés. Eth director d’aguest cuert musicau siguec Jòse Bergés, que ja auie dirigit un aute videoclip musicau en aranés, e premiat damb eth Prèmi deth Public pr’amor deth videoclip de Es Paums Oxitònia non hè guaire.

Era prumèra cançon de quate

Era musica qu’ei interpretada per Es Paums e Es Paoesses de Vilamòs.

« Artz-os-Eth Balh der os » ei, totun, a mès d’un videoclip e un documentau, ua cançon que forme part dera tetralogia Artz, que vò descríuer era preistòria dera Val d’Aran. Es autes tres cançons d’aguesta tetralogia que son Genèsi, Beret e Mijaran. E entà dar ua imatge internacionau dera madeisha cançon, es contenguts deth videoclip sigueren editadi damb sostítols en aranés, catalan, euskera, castelhan, francés e anglés. Era letra dera cançon siguec escrita peth poèta aranés Jèp de Montoya e era musica siguec compausada per Jaume Masana Castet, ambedús dera Asssociacion culturau aranesa Es Paums.

Atau, aguest videoclip, a mès dera beròia e originau musica e scènes, tanben ei fòrça interessant etnologicament, pr’amor que s’i pòden veir diuèrsi esturments istorics aranesi, proprietat de Jaume Masana, coma eth bot aranés, era còrna, era cargòlha, es esqueres, es tringòles o es trucs, çò que da mès interès istoric ad aguest videoclip/documentau, a mès deth son interès musicau. Era musica qu’ei interpretada per Es Paums e era Corau Es Paoesses de Vilamòs. Eth videoclip se pòt gaudir a trauèrs de Youtube: https://bit.ly/3ofvpQP.

Cau rebrembar que totes es actritzes e actors que gessen en videoclip « Artz-os-Eth Balh der os » son volontaris aranesi exceptat de Mireia Llunell e Neus Uroz. Aguest videoclip auec eth supòrt der Institut pel Desenvolupament de l’Alt Pirinèu i l’Aran (IDAPA), deth Conselh Generau d’Aran, er Institut d’Estudis Ilerdencs de Lhèida, era Generalitat de Catalonha e es ajuntaments de Canejan e Luishon.

Era Redaccion

Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita

Videoclip – Sapiéncia.eu

NAU VIDEOCLIP DE ES PAUMS