Coma la majoritat de las causas grandas d’aquel mond, Wimbledon aguèt d’originas modèstas e estonantas. L’an 1868, divèrses afogats de l’espòrt decidiguèron constituir l’All England Croquet Club en una superfícia de quatre acres situada a Worple Road, que limita amb la linha de camin de fèrre e pas luenha de l’estacion de Wimbledon.

Los lança-tennis

Cossí lo sieu nòm indica, lo club foguèt creat per la practica tranquilla del croquet. Uèch ans après (1875), una partida del terren foguèt consacrada pels practicants lo “lança-tennis”, espòrt cada còp mai abitual entre los sieus sòcis.

Una decision fòrça acertada, vist que l’an 1877 lo nòm del club foguèt cambiat, en s’adoptar coma nòu nòm All England Croquet and Lawn Tennis Club.

E comencèt la primièra edicion dels Campionats pr’amor d’… una turbina. Un sòci l’aviá regalada al club per lissar los terrens, mas, après uèch ans de servici sens interrupcion, la turbina patiguèt una pana, e i aviá pas de sòus per poder la reparar.

Après divèrsas reünions, un sòci de l’entitat prepausèt l’organizacion d’un torneg e totes decidiguèron demandar un shiling per cada entrada. La competicion comencèt lo 9 de julhet de 1877 e venguèt un grand succès.

Après la deduccion de las despensas del torneg, l’entitat obtenguèt un benefici de dètz liuras, sufisentas per la reparacion de la turbina. La primièra pèira del futur grand torneg èra establida. E la pluèja, associada totjorn a Wimbledon, apareguèt ja en aquela primèira ocasion. La finala foguèt jogada lo 19 de julhet e pas lo 12 coma èra previst. La victòria foguèt per Spencer W. Gore, qui ganhèt a W.C. Marshall amb 6-1, 6-2, 6-4.

Cada an, pendent quinze jorns, lo torneg de tennis paralisa la vida sociala de Grand  Bretanha, centrada exclusivament en las verdas e sonhadas superfícias del club. Aquela simbiòsi entre Tennis e Wimbledon es consolidada e incrementada cada edicion. Tennis e Wimbledon, dos concèptes inseparables totjorn.

Escrit per CARLES ROVIRA SALVATELLA

Fotografias de BTA – Wimbledon Lawn Tennis Museum