De nòvas prepaustas son estadas realizadas après la descobèrta del cran. E tanben una nòva ipotèsi sus l’istòria evolutiva dels dinosaures placats : los estegosaures èran de dinosaures manjaires de plantas, se desplaçant a quatre pès, e amb doas filas de placas del còl fins a l’extrèm de la coa. L’especimèn trobat foguèt recuperat pendent las escavacions paleontologicas menadas per la Fundacion Dinópolis al luòc «Están de Colón», situat en la Formacion Villar del Arzobispo, e data de fa mai de 150 milions d’ans. L’espècia foguèt identificada coma Dacentrurus armatus.

Segon Sergio Sánchez Fenollosa, cercaire de la Fondacion Dinópolis “L’estudi del fossil a permés de revelar d’aspèctes desconeguts de l’anatomia de Dacentrurus armatus, l’estegosaure europèu essencial. Los crans son rarament conservats a causa de la fragilitat dels òsses. Mas ajudarà a comprene cossí los crans estegosaurides evolucionèron ».

De mai, los cercaires an prepausat una novèla ipotèsi que definís las relacions evolutivas dels estegosaurides a la planeta. E es nascut un nòu grop de dinosaures nomenat Neostegosauria. Aqueles dinosaures èran de talha mejana e granda e visquèron en Africa e Euròpa pendent lo Jurassic mejan e tardièr, e en America del Nòrd pendent lo Jurassic tardièr. Tanben visquèron en Asia pendent lo Jurassic tardièr e lo Cretacèu primièr.

Una referéncia globala

Segon lo cercaire Alberto Cobos, director general de la Fondacion Dinópolis «Aquesta dobla realizacion – tant l’estudi d’un fossil excepcional coma la prepausta d’una novèla ipotèsi evolutiva – situa la recerca coma una referéncia globala dins los estudis dels estegosaurides.»

Lo site fossil de Riodeva contunha doncas d’èsser subjècte de recerca e conten encara de nombroses fossils de dinosaures, dont mai d’elements del meteis especimèn adulte e, tanben d’individús joves, una combinason rara en aquel tipe de dinosaures.

La Redaccion