Divèrses scientifics britanics confirman que lo Solelh arribariá en 2030 a un fenomèn conegut coma lo minim de Maunder. Aquò provocariá una davalada generalizada de las temperaturas en la planeta tota. L’estudi es estat fach per la Societat Astronomica Reiala anglesa e soslinha que las temperaturas mejanas poirián caire fins un 60%.
Aquesta davalada de temperaturas que poiriá començar dempuèi 2030 e que durariá en la Tèrra fins l’an 2040 seriá coma l’epòca que i aguèt entre 1645 e 1745, quand los abitants de la planeta poguèren sentir mai de fred. Aqueste periòde es conegut scientificament coma lo minim de Maunder e a coma caracteristica principala que las divèrsas tacas que i a al Solelh – regions ont la temperatura es fòrça mai baissa que las del sieu entorn- son mai flacas.
Segon aquesta nòva ipotèsi qu’an bastit divèrses scientifics angleses poiriam parlar d’un nòu cicle solar descobèrt amb d’espleches nòus e amb nòvas tecnologias e qu’abans avián pas pogut èsser confirmadas. An fach un nòu model en tot analizar la circulacion dels camps magnetics dins e sus la superfícia solara. Aqueste fenomèn tanben es conegut coma efècte dinamo.
«Avèm pogut confirmar que las doas ondadas magneticas que i a dins lo Solelh an coma origina dos tipes de matèria totalament desparièras –çò diguèt la scientifica Valentina Zharkova en tot presentar aquesta teoria fa pauc en una reunion astronomica-. Las doas pòdon demorar fins 11 ans maugrat èsser desparièras. Pendent cada cicle las ondadas viatjan de l’emisfèri nòrd al sud del Solelh. Par rapòrt al cicle solar las previsions an una exactitud del 97%”.
Una teoria pas definitiva
Totun, aquesta descobèrta es pas segura per totes los scientifics. Aital o a volgut mostrar Etienne Parizot, astrofisician del laboratòri APC. “Es un nòu modèl fòrça interessant pr’amor que s’a pogut identificar un nivèl de complexitat mai superior als autres- çò ditz Parizot – mas dire qu’arribarà una pichona epòca glaciala es benlèu una exageracion. L’activitat magnetica influís, es vertat, mas podem dire que los rais cosmics an d’influéncia sus las temperaturas e lo clima? Es pas segur. Los estudis actuals son pas encara definitius”.
Malgrat la discussion dubèrta en la comunautat scientifica, un grop de scientifics angleses an volgut manifestar la sieuna seguretat en aquò. Per eles la Tèrra patirà un minim de Maunder en mens de 15 ans e demorarà aital pendent las annadas 2030-2040. En aqueste periòde las doas ondadas solaras seran totalament desincronizadas e aquò produsirà fòrça mens activitat solara. Es çò qu’afirma Zharkova.
Aquesta teoria es pas lo primièr còp qu’es sostenuda pels scientifics. Ja en 2015 la NASA aviá avisat sus l’escasença d’èsser reala, mas la certitud èra pas tant solida. En aquel moment las escasenças d’aver aqueste tipe de variacions climaticas arribava pas al 20%. Tanben Richard Harrison, del Laboratòri Rutherford Appleton, confirmèt que los ivèrns serián de mai en mai durs pr’amor que la Tèrra marchava cap a una nòva miniedat glaciala.
Lo darrièr minim de Maunder se debanèt entre 1645 e 1715. Alavetz rius coma lo Sèina èran totalament gelats. E segon qualques scientifics coma Parizot, las temperaturas en determinadas regions europèas coma en Occitània, poirián davalar fins a -25º jos zèro. Aital o auriá recentament publicat lo jornal Le Figaró.
La Redaccion
