Home PALEONTOLOGIA UNA ESPÈCIA D’HOMO ARRIBÈT A AMERICA FA …130.000 ANS !
UNA ESPÈCIA D’HOMO ARRIBÈT A AMERICA FA …130.000 ANS !

UNA ESPÈCIA D’HOMO ARRIBÈT A AMERICA FA …130.000 ANS !

0
0

Una descobèrta mai qu’estonanta. E que provocarà una granda discussion dins la comunautat arqueologica estatsunidenca. Un nòu estudi confirma la descobèrta d’òsses trincats de mastodont en San Diego per una espècia desconeguda d’Homo fa 130.000 annadas. Lo debat sus aquesta question tòrna a èsser dubèrt.

Lo controvertit estudi prepausa qu’aquestes òsses serián l’evidéncia mai clara de la preséncia d’una espècia desconeguda en America fòrça abans de çò que la teoria academica americana ditz. Aquesta espècia auriá arribat fa mai de 130.000 ans al continent american e pas fa 25.000 ans.

Los òsses de mastodont serián estats trincats per una espècia desconeguda. Fotò del Musèu d’Istòria Naturala de San Diego.

L’estudi, maugrat que la descobèrta dels òsses de mastodont, un ancian ancessor de l’elefant d’uèi, foguèt realizada entre 1992 e 1993 es estat publicat ara a la revista scientifica numerica Nature. Los lors autors, Steven Holen, del Centre per la Recèrca Paleolitica Americana d’Hot Springs, en Dakota dels Sud, e lo paleontològ Thomas Deméré, del Musèu d’Istòria Naturala de San Diego, confirman que las pròvas pòdon pas èsser discutidas.

Ambedós scientifics afirman que fa 130.000 ans lo clima mai umid e caud auriá laissat pas a una connexion per tèrra entre Asia e Alaska. Aquò auriá balhat una escasença a d’ancians colons qu’aurián arribat a America amb de canoas o autres vaissèls e aurián arribat a la còsta del Pacific nòrd-americana.

Los candidats a aqueste trincament d’òsses de mastodont en Califòrnia del sud poirián èsser neandertalians, denisovans o tanben Homo erectus pr’amor que totes eles demoravan al nòrd d’Asia fa 130.000 ans. Mens escasenças i auriá que foguèsse la nòstra espècia actuala, Homo sapiens, dison, pr’amor que solament arribèt al sud de China fa entre 80.000 e 120.000 annadas. Al costat dels òsses de mastodont, totun, son pas estats trobats òsses de cap espècia ominida.

Una espècia misteriosa

Maugrat tot aquò, l’espècia d’Homo qu’auriá arribat prèp de la vila actuala de San Diego auriá trincat los òsses de mastodont per poder los minjar melhor e aurián laissat troces dels espleches utilizats, segon sospechan aquestes scientifics. De mai, afirman que los ominids mangèron tanben la pèl del mastodont pr’amor que i a pas traças d’espleches utilizats per copar la pèl als òsses de l’animal.

Lo mastodont, un ancessor de l’elefant d’uèi lo jorn, seriá estat caçat per de neandertalians, denisovans o homo erectus mas pas per las nòstra espècia.

Aquesta nòva ipotèsi arqueologica sus la populacion americana e la sieuna origina ja a provocat divèrsas reaccions dins la comunautat scientifica. Fins uèi lo jorn solament es reconegut que la nòstra espècia, e cap d’anterior, arribèt al continent american, fa 20.000 ans e pro. Mas perqué la comunautat scientifica es tant conservadora ?

L’estudi ditz que lo sud californian a l’epòca auriá divèrses rius qu’aurián balhat los òsses d’entre 10 e 30 centimètres. Los scientifics dison que los ominids utilizèron aquestas grandas pèiras per trincar los òsses de mastodont. L’utilizacion actuala de las pèiras balhèt resultas similaras en d’autres òsses.

Maugrat aquò, i a scientifics que creson pas aquestas pròvas e afirman que las maquinas de construccion actualas poirián aver trincat los òsses e que i a pas cap pròva d’un riu que boleguèsse los òsses o que los animals foguèsson caçats.

Fin finala, l’arqueològa Erella Hovers, de l’universitat israeliana de Jerusalem, ditz que cal aver precaucion amb aquesta descobèrta. Per ela lo trincament dels òsses auriá estat facha per Homo sapiens, pr’amor que jamai en tota l’istòria de l’arqueologia mondiala s’a trobat cap pròva de la preséncia d’autras espècias ominidas al Nòu Mond.

Christian Andreu*

*Dempuèi uèi trobarètz una pichona biografia dels redactors de Sapiéncia en la seccion Qui sèm.

LEAVE YOUR COMMENT

L'adreça electrònica no es publicarà. Els camps necessaris estan marcats amb *