Home SCIÉNCIA UN DOBLE PROCÈS D’IMMUNOTERAPIA AUCÍS TOTA MENA DE CÀNCER
UN DOBLE PROCÈS D’IMMUNOTERAPIA AUCÍS TOTA MENA DE CÀNCER
0

UN DOBLE PROCÈS D’IMMUNOTERAPIA AUCÍS TOTA MENA DE CÀNCER

0

Çò que poiriá venir una granda descobèrta medicala es estat publicat dins la revista numerica Science Translational Medicine. L’injeccion de pichonas quantitats d’agents estimuladors d’immunitat dins de tumors destrutz tota mena de càncer. Son las resultas d’un estudi nòu fach per una còla de l’Universitat de Medecina d’Stanford (Reialme Unit). Aquò, sens dobte, se contunhan las espròvas e s’aquestas son positivas, poiriá venir una de las descobèrtas mai estonantas dels darrièrs tempses.

Los scientifics creson que l’injeccion dels dos agents dirèctament e amassa dins lo càncer activariá tornarmai lo trabalh de las cellulas T.

“En tot utilizar los dos tipes d’agents amassa avèm pogut confirmar l’eliminacion totala de divèrses càncers –çò diguèt Ronald Levy, autor de l’estudi–. Aquò dispensa de la necessitat d’identificar los càncers e a pas de besonh de l’activacion del sistèma immunologic dins las cellulas del pacient”.

Totun, las espròvas realizadas fins ara son estadas solament fachas amb de mirgas de laboratòri e per ansin cal contunhar la recèrca scientifica. Aquò arriba après la confirmacion que los càncers existisson dins una dimension que, de còps, es plan ligada amb lo sistèma immunologic.

Aital, las cellulas T –immunas– reconeisson sovent las proteïnas estrangièras dins lo càncer e ansin l’atacan. Mas quand lo càncer creis, aqueste arrèsta l’activitat de las cellulas T. E per tant aquela còla a ensajat de las reactivar en tot injectar de microgramas de dos agents immunologics dirèctament dins lo càncer.

Dos agents desparièrs

Un d’aquestes es un compausat d’ADN sonat oligonucleotid, que trabalha amb las cellulas T per amplificar lor trabalh. L’autre seriá un anticòrs que, a travèrs d’una substància apelada OX40, activa tornarmai las cellulas T contra lo càncer.

Los scientifics creson que l’injeccion dels dos agents dirèctament e amassa dins lo càncer activariá tornarmai lo trabalh de las cellulas T. E aquestas tornan reconéisser las proteïnas especificas del càncer e l’atacan fins a lor destruccion finala.

L’injeccion de pichonas quantitats d’agents estimuladors d’immunitat dins de tumors destrutz tota mena de càncer.

Las espròvas scientificas an plan capitat dins un 99% dels cases amb de mirgas de laboratòri dins tota mena de càncers. Aital, 87 de 90 mirgas se gariguèron totalament del càncer que patissián e sonque tres moriguèron pr’amor que lo càncer tornava aparéisser. Aital foguèt confirmat dins de càncers del palmon, del colon e de la pèl. A mai, l’ataca d’un primièr càncer ajudava a la destruccion de futurs càncers.

“Es una bèla capitada. Un grand pas dins la sciéncia –çò diguèt Ronald Levy–. Amb aquel sistèma es pas necite d’identificar lo tipe de càncer ni las proteïnas d’aqueste pr’amor que las cellulas T trabalhan de manièra parièra fins a la destruccion finala del càncer”.
Ara se faràn d’autras espròvas sus 15 pacients umans amb linfòma, e se capitèsse plan lo metòde començarián d’èsser tractadas d’autras menas de càncer. Se pensa tanben ja a aquò coma tractament preventiu. Per ara “ i a pas de limits – çò confirmèt Levy”.

 La Redaccion

Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.

Christian Andreu Nasquèt a Barcelona en 1972, estudièt jornalisme a l’Universitat Autonòma de Barcelona e son especialitat es la politica internacionala. Parla uech lengas dont l'occitan. A publicat lo libre Art i Lletres a Horta-Guinardó e a collaborat totjorn amb de jornals catalans, bascos e occitans coma La Veu del carrer, El Punt, Egin, A vòste e Jornalet. Es maridat, a dos enfants, Jana e Roger, e demòra a Reus.