Home DIVÈRSES UA DIÈTA NAUTA EN SAU PROVÒQUE DEMÉNCIA EN ARRATS
UA DIÈTA NAUTA EN SAU PROVÒQUE DEMÉNCIA EN ARRATS
0

UA DIÈTA NAUTA EN SAU PROVÒQUE DEMÉNCIA EN ARRATS

0

Diden qu’ua dièta nauta en sau non ei bona entara santat umana. E entà demostra’c ua còla de scientifics a hèt un estudi damb arrats. An podut confirmar qu’era dièta fòrça nauta en sau provòque directaments deméncia en es arrats. Un avís entàs umans.

Eth nau estudi confirmèc qu’ua dièta nauta en sau redusís era circulacion dera sang entath cervèth e açò ei ua causa dirècta dera deméncia en es arrats. Era descobèrta da lutz sus es efèctes de minjar damb fòrça sau e donques coma se pòt lutar contra aqueri.

Diuèrsi experiments confirmèren e permeteren saber es mecanismes biologics que relacionauen mès sau e era deméncia.

Aguest estudi, eth prumèr que confirmèc era connexion entre era santat deth cervèth e ua dièta nauta en sau ac demostrèc damb era reduccion neurovascular deth cervèth e es nivèus de coneishença d’aqueri animaus de laboratòri.

“Auem descobèrt qu’es arrats desvolopauen era deméncia maugrat que i auesse baisha tension ena sang – çò diguec Constantino Iadecola, der institut de Medecina Weill Cornell -. Açò siguec ua vertadièra suspresa entà nosati pr’amor qu’en es umans es efèctes negatius dera sau an estat atribuïts tostemps ara ipertension.

Ua dieta fòrça mès rica en sau

Pendent er estudi es scientifics dèren entre 4% e 8% mès de sau as arrats. Açò que representaue entre 8 a 16 còps mès sau qu’ena dièta normau des arrats. Ère un nivèu de sau semblant ath dera dièta normau damb sau des umans. Dempús 8 setmanes es cercaires utilizèren un escanèr de ressonancies magnetiques enta veder es resultats.

Es arrats patien ua reduccion dera circulacion dera sang basicaments en dus regions cerebraus, çò ei es connectades damb apréner e memoritzar. Es resultats confirmèren que i auie ua reduccion deth 28% en eth cortèx cerebrau e un 25% en er ipocamp.
Era còla descorbic tanben qu’un tipe de cellules dera sang, es cellules endoteliaus, produsien mens oxid nitric, un gas relacionat damb es venes dera sang mès dubèrtes e donques ua circulacion mès grana d’aquera.

Entà confirma’c era descobèrta es scientifics dèren un aute còp ua dièta normau as arrats pendent quate setmanes mès e trapèren qu’era circulacion dera sang en eth cervèth e es funcions endoteliaus auien tornat a nivèus normaus. Solament es arrats qu’auien auut ua dièta nauta en sau desvolopèren deméncia : arreconeishien es objèctes pejor e bastien es nins tanben pejor, ua activitat jornalièra en es arrats: utilizauen fòrça mens materiaus entà bastir es nins qu’es auti arrats e pendent fòrça mens temps.

Ua dièta nauta en sau redusís era circulacion dera sang entath cervèth e açò ei ua causa dirècta dera deméncia en es arrats.

Dempús diuèrsi experiments confirmèren e permeteren saber es mecanismes biologics que relacionauen mès sau e era deméncia. Atau, es arrats auien produsit ua adaptacion d’immunitat en tot desvolopar era creacion de mès cellules blanques ena sang. Açò arturaue era produccion d’ua proteïna aperada IL-17 que, ath son torn, èra era causa dera reduccion d’oxid nitric e de cellules endoteliaus.

Fin finau, es scientifics heren un aute experiment. Dèren ua droga entà arrestar era supression dera activitat der oxid nitric aperada inibidor Y27632.

“Era dròga provoquèc era reduccion des nivèus dera proteïna IL-17 e es arrats tornèren a auer es foncions cognitiues normaus, çò diguec Iadecola”. De mès, era naua dròga semble èster un trabalh ideau entath futur, çò avisec Giuseppe Faraco, dera madeisha còla.

“Semble èster ua bona dròga ena luta cerebrau contra es efèctes d’ua dièta nauta en sau- çò afirmèc Faraco. Poirie èster tanben ua bona medecina en malauties coma era esclerosi múltiple, era artritis reumatoïde e d’autes associades damb nivèus nauti dera proteïna IL-17”. Er estudi siguec publicat ena revista Nature Neuroscience.

Era Redaccion

Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita

Christian Andreu Nasquèt a Barcelona en 1972, estudièt jornalisme a l’Universitat Autonòma de Barcelona e son especialitat es la politica internacionala. Parla uech lengas dont l'occitan. A publicat lo libre Art i Lletres a Horta-Guinardó e a collaborat totjorn amb de jornals catalans, bascos e occitans coma La Veu del carrer, El Punt, Egin, A vòste e Jornalet. Es maridat, a dos enfants, Jana e Roger, e demòra a Reus.

LEAVE YOUR COMMENT

L'adreça electrònica no es publicarà. Els camps necessaris estan marcats amb *