TORISTAS A LA LUNA EN 2018
L’agéncia privada SpaceX a anonciat que en 2018 dos toristas seràn los primièrs en far un vòl a la Luna. Aquestes doas personas ja an pagat un depòsit d’argent fòrça naut e lèu començaràn a far las pròvas de resisténcia de santat e esportivas. De mai, començaràn tanben un programa d’entrainament espacial abans de finir aqueste an. Un fach istoric per l’umanitat.
La mission, qu’a agut totjorn l’ajuda del Departament Comercial de la NASA, utilizarà per enviar los toristas a la Luna la fusada Falcon Heavy, desvolopada amb finançament d’SpaceX e que laissarà la Tèrra en tot s’elevar pendent la prima de 2018.
Un programa mai qu’ambiciós
Per poder enviar aquestes dos toristas amb una fusada espaciala a la Luna en mens d’un an SpaceX iniciarà lèu un programa fòrça ambiciós. De primièr, e abans de finir 2017 e amb l’ajuda de la NASA, la naveta espaciala Dragon serà enviada sens umans a l’Estacion Espaciala Internacionala. Puèi, un segond vòl serà enviat tornarmai a aquesta estacion en tot començar 2018. Aital, SpaceX a signat un contracte amb la NASA per poder enviar tres navetas espacialas cada an a l’Estacion Espaciala Internacionala. D’aquestas, doas seràn sens umans e una pilotada.
L’ajuda de la NASA a coma origina la volontat de redusir lo finançament de las missions governamentalas estatsunidencas. Aital, l’administracion de Washington aurà de pagar mens d’argent per los vòls e ajudarà las missions privadas a l’espaci, un fach inedit fins uèi lo jorn.
La mission que menarà los dos toristas a la Luna en 2018 serà un vòl al torn d’aqueste satellit de la Tèrra e aquestes arribaràn pas a metre pè en la superficia lunara. Totun, aqueste vòl ja es estat considerat coma una escasença istorica per l’umanitat pr’amor que l’òme a tornat pas a la Luna dempuèi fa 45 annadas e poiriá ajudar al desvolopament de viatges mai rapids cap a totes los luòcs del Sistèma Solar.
“Es una escasença unica per l’umanitat de tornar a l’espaci mai prigond per primièr còp en 45 ans – çò diguèt Elon Musk, director e propietari d’SpaceX-. Amb aqueste vòl los toristas viatjaràn mai lèu que degun abans qu’eles per lo Sistèma Solar. Es un nòu inici d’una nòva epòca d’exploracion umana e comença l’an que ven”. Los toristas son alerta pr’amor que sabon que i a risques. Maugrat aquò, Musk confirmèt que l’entrepresa farà tot çò de possible per minimizar aquestes risques.
D’autras missions espacialas lèu
De mai, l’entrepresa associada a aqueste tipe de vòls, Virgin Galactic, ja a confirmat que lèu començaràn los viatges toristics espacials amb la sieuna naveta espaciala SpaceShipTwo e a un prètz de 250.000 dolars per torista. Totun, los aterratges lunars encara son pas previstes pr’amor que se considèra que i a fòrça risques per la santat umana.
S’aqueste tipe de vòls capita, lèu veirem cossí de toristas son enviats a far de vòls espacials al torn de la Luna o la Tèrra. E, maugrat que lo còst d’aquestes es encara plan naut SpaceX afirma que lèu seràn mai redusits. Tot aquò ajudarà, segon ditz SpaceX, a desvolopar vòls espacials per menar d’umans a Mart lèu lèu, la tòca finala d’aquesta entrepresa. S’aquò capita serà l’inici definitiu de l’Edat de l’Exploracion Espaciala de l’espècia umana.
Christian Andreu*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
