Home TECNOLOGIA SPACE X ASSAJA LA NAU ESPACIALA MAI POTENTA DEL MOND
SPACE X ASSAJA LA NAU ESPACIALA MAI POTENTA DEL MOND
0

SPACE X ASSAJA LA NAU ESPACIALA MAI POTENTA DEL MOND

0

L’entrepresa privada espaciala Space X, d’Elon Musk, a fach ja d’assages amb Falcon Heavy, la nau espaciala amb mai de poténcia de la planeta. Los assages foguèron una reüssida e demòstran que la nau pòt cargar fins a 64 tonas e las metre en orbita. Los assages foguèron considerats coma un pas de gigant dins l’estrategia espaciala actuala vèrs Mart.

Space X, pòt afirmar qu’es ara la primièra dins la concurréncia del Mond aeroespacial actual per arribar a la Planeta Roja.

La nau espaciala Falcon Heavy (falcon pesant) sortiguèt de Cap Canaveral, en Florida, amb mai de 64 tonas de carga. Pendent lo primièr vòl la nau aviá dedins plusors produches de Tesla, l’entrepresa de veituras electricas, tanplan de Musk.

Aital, la Falcon Heavy, s’enaurèt del Centre Espacial Kennedy, de la plataforma 1 estant, la meteissa que ne partiguèron las naus Apollo, e qu’arribèron sus la Luna entre 1961 e 1972. Falcon Pesant es ara considerat coma la nau amb la mai granda capacitat de carga dempuèi Saturn V, que podiá, malgrat aquò, portar prèp de 120 tonas de carga. Lo recòrd istoric doncas foguèt pas ganhat tornamai amb Falcon Pesant.

Tres naus en una

La nau espaciala Falcon Pesant es facha de tres naus Falcon mai pichonas que, totas amassa, forman una nau mai granda. L’idèa es que, un còp dins l’espaci, se pòdon desseparar per laissar la carga ailà. Las partidas lateralas de la nau se desseparèron doas minutas e mièja après lo lançament e la partida centrala 30 segondas puèi. Après aquò, totas las partidas tornèron en Florida o dins l’ocean Atlantic.

La nau espaciala Falcon Heavy (falcon pesant) sortiguèt de Cap Canaveral, en Florida, amb mai de 64 tonas de carga.

A mai, la nau espaciala mesura 70 mètres –çò es coma un bastiment de 23 estatges– e ten 27 motors que pòdon aver pro de fòrça per portar 2500 tonas, valent a dire coma los motors de 18 avions Boeing 747. Sa capacitat de carga es dos còps mai granda que la de la nau Delta IV Heavy, de l’entrepresa United Launch Alliance. Segon Space X, cada vòl còsta 90 milions de dolars.

Amb aquela avançada tecnologica l’entrepresa de Musk volguèt demostrar sa capacitat al mercat aeroespacial, davant d’autras entrepresas coma la NASA o divèrsas entrepresas de satellits de telecomunicacions de l’armada dels Estats Units. Segon Musk, cal ara poder far del comèrci espacial un negòci pro bon per poder menar l’èsser uman vèrs Mart, la tòca finala d’Elon Musk.

Totun, e malgrat la reüssida de la pròva, Musk aviá avisat que seriá pro aürós se la nau espetèsse en mila tròces. Los engenhaires, d’autre costat, avián dich que lo moment de la desseparacion de las partidas lateralas de Falcon Pesant èra un moment plan dangierós pr’amor de la tecnologia utilizada.

Un còp passat aquel moment, lo quite Elon Musk confirmèt a la premsa internacionala que l’assag èra estat una enòrma reüssida, e aital son entrepresa, Space X, pòt afirmar qu’es ara la primièra dins la concurréncia del Mond aeroespacial actual per arribar a la Planeta Roja.

 La Redaccion

Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.

Christian Andreu Nasquèt a Barcelona en 1972, estudièt jornalisme a l’Universitat Autonòma de Barcelona e son especialitat es la politica internacionala. Parla uech lengas dont l'occitan. A publicat lo libre Art i Lletres a Horta-Guinardó e a collaborat totjorn amb de jornals catalans, bascos e occitans coma La Veu del carrer, El Punt, Egin, A vòste e Jornalet. Es maridat, a dos enfants, Jana e Roger, e demòra a Reus.