Home DIVÈRSES RESCONTRAN UN DESTRUCTOR ENFONSAT A LA MAR DE BERING
RESCONTRAN UN DESTRUCTOR ENFONSAT A LA MAR DE BERING
0

RESCONTRAN UN DESTRUCTOR ENFONSAT A LA MAR DE BERING

0

De còps son trobadas jos las aigas de la planeta de rèstas de naviris ancians e aquò es un fach estonant per la sciéncia arqueologica mondiala. Pas sovent es encontrat un vaissèl d’importància istorica e ara, apuèi 75 annadas es estat trobat un destructor de la Segonda Guèrra Mondiala. Foguèt enfonsat dins un episòdi fòrça pauc conegut d’aquela guèrra entre Estats Units e Japon.

Lo destructor estatsunitenc Abner Read truquèt amb una mina japonesa en 1943 e s’enfonsèt, mas pas tot.

L’episòdi se desvolopèt lo 18 d’agost de 1943 quora lo destructor estatsunitenc USS Abner Read truquèt amb una mina japonesa a la Mar de Bering. Lo prètzfach entraïnèt la mòrt de 71 marinièrs estatsunitencs e ara lors familhas pòdon saber quora, cossí e ont moriguèron.

Las rèstas del destructor Abner Read son estadas rescontradas davant de l’illa aleutiana de Kiska, dins la partida mai septentrionala de la Mar de Bering. Aquela illa foguèt un dels dos territòris estatsunitencs conquistats per l’armada japonesa e pendent junh 1942 e agost 1943 foguèt lo luòc d’una longa batalha demest las doas nacions per sa conquista.

Un episòdi escur de l’istòria estatsunitenca

“La descobèrta d’un tròç de popa del destructor estatsunitenc Abner Read ajudarà plan conéisser melhor un episòdi fòrça escur de la nòstra istòria – çò diguèt l’amiral de la Marina d’aquel país Tim Gallandet -. Es pas solament important per la pròpria istòria d’aquela guèrra mas atanben pr’amor que las familhas dels marinièrs poiràn ara balhar d’onors als marinièrs mòrts al luòc ont moriguèron”.

La conquista de l’illa aleutiana de Kiska durèt divèrses meses, dempuèi 1942 entrò 1943.

La tròba d’un tròç de popa del destructor Abner Read foguèt facha per una còla scientifica de l’Institut Oceanografic Scripps de Califòrnia e l’Universitat de Delaware lo 17 de juni d’ongan. Una seccion de la popa foguèt encontrada a mai de 80 mètres jos la mar, en fàcia a l’illa aleutiana de Kiska.

L’enfonzament del naviri se debanèt a 01:50 oras d’aquel jorn quora truquèt una mina japonesa. Totun, la tripulacion poguèt menar la majoritat del destructor fins a pòrt. “Solament podèron o far amb l’ajuda de dos vaissèls que i aviá prèp – çò diguèt Sam Cox, de la Marina dels Estats Units-. Sens l’esfòrç tras qu’uman d’aqueles marinièrs lo destructor poiriá pas èsser estat sauvat”.

Atal, lo destructor Abner Read foguèt sauvat e qualqu’unes meses apuèi tornèt lutar contra los japoneses fins que foguèt destruch en novembre de 1944 per l’accion d’un kamikaze pendent la Batalha de Leyte. Pasmens ara, la Marina estatsunitenca vòl protegir aquel luòc e informar las familhas ont moriguèron aqueles 71 marinièrs. Un fach que se passa pauc sovent aprés tantas annadas apuèi la fin d’aquela òrra guèrra”.

La Redaccion

Christian Andreu Nasquèt a Barcelona en 1972, estudièt jornalisme a l’Universitat Autonòma de Barcelona e son especialitat es la politica internacionala. Parla uech lengas dont l'occitan. A publicat lo libre Art i Lletres a Horta-Guinardó e a collaborat totjorn amb de jornals catalans, bascos e occitans coma La Veu del carrer, El Punt, Egin, A vòste e Jornalet. Es maridat, a dos enfants, Jana e Roger, e demòra a Reus.

LEAVE YOUR COMMENT

L'adreça electrònica no es publicarà. Els camps necessaris estan marcats amb *