Home GEOGRAFIA PEJORA LA POLLUCION EN ANTARTIDA
PEJORA LA POLLUCION EN ANTARTIDA
0

PEJORA LA POLLUCION EN ANTARTIDA

0
0

Lo corrent marin antartic es estat considerat fins a uèi coma una proteccion naturala d’Antartida contra la pollucion environamentala. Totun, plusors scientifics començan d’alertar qu’aquel ocean poiriá èsser encara mai polluit que non se pensava. Es un ecosistèma mai que fragil en çò que tòca balenas, fòcas e pingoïns. Çò de pièger: los microplastics.

Los scientifics demandan ara una solucion internacionala a la pollucion en aquel continent.

Un estudi es estat fach per de scientifics de las universitats de Hull e British Antartic Survey (BAS). La conclusion seriá alarmanta: los nivèls de microplastics que i a en aquel ocean austral son cinc còps piègers que çò que se sospechava. Segon Catherina L. Waller, cap d’aquel estudi, “pensam qu’es un continent isolat, salvatge encara, mas es un environament plan fragil e los microplastics trobats son dins lo krill e lo zooplancton, regim de fòrça animals”.

Demanda d’un esfòrç internacional

Los cercaires qu’an realizat aqueste estudi demandan ara un esfòrç mai grand de tota la comunautat internacionala per contunhar la recèrca scientifica e confirmar la preséncia de plastic dins l’ocean Antartic. “Es urgent de far un esfòrç a travèrs de la coordinacion internacionala e de definir definitivament lo nivèl de microplastics dins l’ocean meridional, çò diguèt Waller. Es un airal amb pauca activitat umana e lo nivèl de plastics es encara mai alarmant”.

Per ansin, los scientifics an volgut getar un crit d’alarma. Los nivèls de pollucion per microplastics trobats dins aquel ocean son parièrs als d’autres oceans de la planeta. E aquò es una donada fòrça negativa. Segon los cercaires, las estacions de pesca e los vaissèls toristics presents dins l’airal ne pòdon pas èsser la causa. Los microplastics an una autra origina.

Los microplastics trobats dins l’ocean Antartic mesuran 5 millimètres e son de tròces de plastic manufacturats, de produches de beutat o de dentifrici, o quitament de botelhas o de farda que son escampadas dins l’ocean dels vaissèls de transpòrt industrial estant.

Ara la situacion environamentala marina es desparièra. Lo corrent marin antartic recep encara mai d’aiga dels corrents marins de l’Atlantic e del Pacific. Un fach nòu e estonant. Per ansin, la pollucion per de microplastics. Segon l’estudi, lo plastic es marrit per l’environament pr’amor que dintra dins lo regim de fòrça animals que pòdon aital venir malauts en causa d’infeccions.

Plusors scientifics començan d’alertar que l’ocean antartic poiriá èsser encara mai polluit que non se pensava.

De mai, las recentas decisions legislativas de mai d’un país, coma la Lei estatsunidenca Contra los Microplastics dins l’Aiga de 2015 (Microbead-Free Waters Act), seràn pas en vigor entrò 2018. E per ansin los scientifics demandan una solucion internacionala. Sus la planeta tota, i a pas cap de nòrma internacionala sus la pollucion per microplastics dins los oceans. E aquò maugrat qu’aquela problematica ja es estada identificada coma un afar que cal resòlver de manièra urgenta en çò que tòca l’environament de la Tèrra.

Los efèctes de la pollucions per microplastics dins los oceans es una problematica que ja foguèt descobèrta pendent los ans 1970. Mas pauques estudis scientifics son estats faches sus la contaminacion reala de l’ocean Antartic uèi lo jorn. Aquel estudi ajuda doncas a conéisser aquela problematica environamentala d’aquela partida de la planeta.

Segon la còla de cercaires qu’an realizat l’estudi, cal ara efectuar un estudi fòrça mai prigond e amb una coordinacion internacionala per determinar la preséncia dels microplastics ailà e cossí afèctan la fauna e la flora del luòc. En mai d’aquò, cal poder far de mapas sus la contaminacion de l’airal e confirmar cossí pòdon èsser evacuats.

Los scientifics an afirmat que, per o poder far, los metòdes son simples e qu’amb l’utilizacion dels sols vaissèls presents dins l’ocean austral ja n’i auriá pro per arribar a de conclusions definitivas. E començar d’agir. Enfin. Aital o esperam.

La Redaccion

Aqueste article serà tanben publicat dins Jornalet , lo primièr quotidian en linha de lenga occitana, amb lo qual Sapiéncia a un acòrdi de cooperacion.

Christian Andreu Nasquèt a Barcelona en 1972, estudièt jornalisme a l’Universitat Autonòma de Barcelona e son especialitat es la politica internacionala. Parla uech lengas dont l'occitan. A publicat lo libre Art i Lletres a Horta-Guinardó e a collaborat totjorn amb de jornals catalans, bascos e occitans coma La Veu del carrer, El Punt, Egin, A vòste e Jornalet. Es maridat, a dos enfants, Jana e Roger, e demòra a Reus.

LEAVE YOUR COMMENT

L'adreça electrònica no es publicarà. Els camps necessaris estan marcats amb *