Ei çò que soslinhen diuèrsi estudis scientifics. Eth començament dera setmana laborau – es deluns – pòt arribar a èster ua jornada de tortura. E se era persona a mès de 40 annades encara mès. Son es conclusions deth nau estudi hèt per Institut australian de Melbourne Worker Paper. Segontes açò, çò que serie beneficiós serie un maxim de 25 ores setmanaus.
Atau, era persona que trabalhe pòt desvolopar melhor era sua santat cognitiua. Mès, com explicar ath nòste cap que çò de melhor ei trabalhar solament quate dies ara setmana ? Era melhor responsa que podem dar, çò contunhen es recercaires d’aguest estudi, ei que trabalhar mès (entre 40 e 50 ores setmanaus) provòque stress e cansament e açò torne encara mès lentes es foncions cognitiues des trabalhadors.
Entà demostrar’ac, es scientifics basen eth sòn estudi en ua mòstra de mès de 3000 òmes e 3000 hemnes. De mès, ei demostrat qu’es trabalhadors qu’an ua jornada laborau de solament 25 ores setmanaus an ua melhor coneishença, melhor memòria, e melhors pensaments e coneishements.
Ua edat malaisida
Er estudi tanben demostrèc que, dempús des 40 annades, i a determinades regions deth cervèth que se tornen mès lentes. Aguesta manca de concentracion e cansament cognitiu ei encara mès visible dempús des 50 annades. Totun, contunhen es scientifics, trabalhar d’ua manèra moderada ajude ara santat intellectuau des persones e i a diuèrses manères aué de pode’c hèr. En Olanda bères ues escòles an es professors que solament trabalhen 3 dies e pro pendent era setmana.
“En futur – diden es psicològs dera còla – eth trabalhador poirie redusir era sua jornada de trabalh e contunhar trabalhant. Atau non se pèrd eth know-how des veterani e ath còp eth trabalhador pòt auer un temps de trabalh e un temps de descans. Solament atau melhorarà era sua santat fisica e mentau”.
Tanben pense egau Nekane Rodríguez, directora de Lee Hatch Harrison, ua empresa que contracte trabalhadors qu’an entre 40 e 50 annades. “Cau preparar naui caps en bons ambients de trabalh. Es opcions an d’èster flexibles. An de poder contunhar trabalhant mès d’ua manèra diferent. Cau un acòrd entre es empreses e es trabalhadors entà definir com volen es sues vides laboraus mès tanben privades”.
Eth modèl deth four day week (quate dies setmanaus) prepause a trauèrs de diuèrsi estudis es beneficis psiquics e fisics des trabalhadors mès tanben dera productivitat des empreses. D’auti prepausen encara ua concentracion des dies de trabalh.
Ua solucion serie, diden, trabalhar quate dies e auer 3 dies entara pausa. Tot depen dera empresa e era persona. Damb açò s’acabarie era cultura actuau de mès preséncia en trabalh, un hèt que ja a estat demostrat hè temps que non ajude ara productivitat empresariau. Question de santat donques ?
Era Redaccion
Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita
