Home PALEONTOLOGIA L’ORIGINA UMANA QUE TORNA EN EURÒPA
L’ORIGINA UMANA QUE TORNA EN EURÒPA

L’ORIGINA UMANA QUE TORNA EN EURÒPA

0
0

Bèra pausa a que la sciéncia afirma que l’origina deus ominides, çò qui vòu díser fin finala de l’espècia umana, qu’ei Africa. Mes adara un navèth estudi hèit per ua equipa de geoscientifics alemanda que prepausa Euròpa com l’origina deus ominides. Las dents d’un animau nomat Graecopithecus e qui vivèva mei de 7 milions d’annadas a qu’ac confirmaré.

Lo navèth estudi, publicat en la revista numerica PLOS ONE qu’estó signat au demiei d’autes peu geoscientific de l’Universitat de Tübingen, Jochen Fuss. La tròba d’un maisherar e divèrsas dents en Grècia e Bulgaria d’un primat nomat Graecopithecus que serén la pròva clara que l’origina deus ominides e seré Euròpa e non pas lo continent african. Totun, mantun scientific qu’an dejà amuishat lo lor scepticisme de cap ad aquera novèla.

La region mediterranea d’Euròpa qu’estó enter 9 e 7 milions d’ans un lòc on demorèn divèrs mamifèrs e peu demiei d’eths, monards, girafas, antilòps e ipopotames.

La pròva mei clara qui permet aquera afirmacion que seré la dusau premolara d’aqueth primat pr’amor qu’averé duas raitzes fusionadas, un element caracteristic deus ominides mei ancians e non pas deus monards. Pr’amor d’aquò l’equipa qui realizè l’estudi que cred que los purmèrs ominides e hasón la lor aparicion enter 8 e 6 milions d’ans en Euròpa. La premolara qu’ei vielha de 7,2 milions d’annadas. Mes a despieit d’aquò, d’autes scientifics que digó que ne’s pòt pas enqüèra afirmar que Graecopithecus estó un ominides. La discussion scientifica que demora obèrta.

D’autes scientifics que confirman que lo maisherar e las dents de Graecopithecus trobats que pòden estar d’un ominides, mes tanben d’un monard. N’i a pas arren de segur. Atau com ac ditz Bernard Wood, de l’Universitat George Washington en la capitala estatsunienca. “Totun, que pensi qu’ei mei ominides que monard ”.

D’un aute biais, David Begun, paleantropològue de l’Universitat de Toronto e coautor de l’estudi qu’ei mei prudent. Lo devís qu’ei enqüèra de situar Sahelanthropus e Orrorin – uns primats que demorèn en Africa enter 7 e 6 milions d’ans com los ominides mei ancians”. Totun – çò digó – Euròpa qu’ei un lòc que poderé estar l’origina deus ominides o deu darrèr ajòu comun deu chimpanzé e de l’uman, com Africa”.

Un continent termièra

La tròba d’un maisherar e divèrsas dents en Grècia e Bulgaria d’un primat nomat Graecopithecus que serén la pròva clara que l’origina deus ominides e seré Euròpa.

La region mediterranea d’Euròpa qu’estó enter 9 e 7 milions d’ans un lòc on demorèn divèrs mamifèrs e peu demiei d’eths, monards, girafas, antilòps e ipopotames. Aquera fauna que mudava enter Euròpa e Africa e pr’amor d’aqueth hèit, los scientifics que digón, qu’ei de mau situar ua linha de demarcacion. “Graecopithecus que poderé aver evoluat – çò digón los autors de l’estudi – sus l’un o l’aute continent”.

Segon Begun la fusion de la raitz de la dusau premolara qu’ei ua caracteristica tipica deus ominides mei ancians e Graecopithecus que possedeish aquesta. E aquò haré entrar aqueth primat en la linha evolutiva deus ominides.

Enlà d’aquò, d’autes antropològues que son mei sceptics. Que digón que los ominides mei ancians qu’an un nombre desparièr de raitzes premolaras e que pr’amor d’aquò Graecopithecus ne pòt pas estar classat com ominides. Qu’ei çò que ditz lo paleonantropològue Yohannes Haile-Selassie, deu Musèu d’Istòria Naturau de Cleveland. Qu’estó eth dab d’autes collègas qui descobrín los òs fossiles d’Ardipithecus kaddaba (que demorè en Africa 5,8 milions d’ans a) e qu’afirma que Sahelanthropus e Orrorin que son en la linha evolutiva d’Ardipithecus, çò que hè d’eths los ominides mei ancians e non pas Graecopithecus.

“Totun, la manca de fossiles suplementaris de chimpanzé e gorilla e deus lors ajòus que vad dificile lo hèit de poder classar Graecopithecus o Ardipithecus com vertadèrs ominides – çò digó l’antropològue Matthew Skinner , de l’universitat anglesa de Kent -. E a despieit d’aquò aqueste que situa la linha evolutiva de Graecopithecus en un punt misteriós. Que cau que los cercaires estudian l’origina deus ominides suus dus continents e non pas sonque en Africa”.

La Redaccion

LEAVE YOUR COMMENT

L'adreça electrònica no es publicarà. Els camps necessaris estan marcats amb *