LO COMPUTADOR MAI PODERÓS DE LA PLANETA ES CHINÉS
La lista anuala dels computadors que foncionan mai ràpid e melhor, nomenada TOP500, a confirmat que la China tòrna a aver lo computador mai poderós de la planeta tota. Lo supercomputador se sona 93 Petaflop Sunway TaihuLight e es plaçat al Centre Nacional de Supercomputacion de la vila chinesa de Wuxi.
L’engenh pòt far mai de 93.000 trilions de càlculs per segonda e es dos còps mai ràpid e fins a tres còps mai eficient que lo segond computador d’aqueste listat, lo tanben chinés Tianhe-2, segon a confirmat TOP500.
Demest las sieunas aplicacions i a la manufacturacion avançada, la prediccion del temps e tanben l’analisi de chifras mai que grandas. Aqueste computador a mai de 10,5 milions de basas de donadas produsidas a escala local aital coma 40.960 nodes. Lo sieu sistema operatiu se basa sul programari Linux.
Una superpoténcia en informatica
Dempuèi la publicacion del listat top500, qu’analiza los mai poderoses computadors de la Tèrra, China a subrepassat los Estats Units dins tota sòrta de chifras. Aital, los estatsunitencs son dins aquesta lista amb 165 ordinators e la China ja n’a 167. Aquò qu’es fòrça meritòri pr’amor que China, solament fa 10 ans, aviá 28 ordinators dins aquesta lista e cap d’els èra al TOP30. Mas la sciéncia informatica a avançat plan los darrièrs ans pr’amor que uèi lo jorn ja ocupa los lòcs mai nauts.
De mai, i a 10 ordinators estatsunitencs dins aquesta lista mas se son vistes subrepassats a las primièras posicions – sustot la primièra e segonda plaça – per China, qu’a trabalhat mai e mai dur los darrièrs temps a nivèl informatic.
Las autras posicions dins lo TOP10 dins aquesta meteissa lista son ocupadas per d’ordinators de Japon, Soïssa, Alemanha e Arabia Saudita. TOP500 es una lista que se publica dos còps l’an e informa sus los ordinators mai eficients de la planeta.
“Es malaisit de far de software que pòsca contraròtlar tantas basas de donadas – çò diguèt Less Carr, de l’Universitat de Southampton -. Pr’aquò los supercomputadors trabalhan solament amb d’aplicacions fòrça especializadas. Son plan bons per de determinadas necessitats, mas per d’autres mens complèxas non son pas guaire eficients”.
La Redaccion
