Es la conclusion d’un estudi scientific fach per de cercaires universitaris de Nòva Zelanda e d’Austràlia. Aquò seriá una chifra de prèp de 5,5 miliards de personas sus tota la planeta. De mai, entre un 14% e un 28%, çò es mai de 2000 milions de personas, serián consideradas coma grassas e solament un 10% de la populacion mondiala –prèp de 750 milions– poirián èsser consideradas coma primas.
L’estudi s’es basat sus d’estatisticas de l’an 2014, e las personas subregrassas tanben comprenon las gents que fan d’espòrts. La còla scientifica es estada dirigida per Philip Maffetone del MAFF Fitness PTY Ltd en Sidney, Austràlia, e la conclusion es estada facha publica pr’amor que la còla a volgut provocar d’inquietud dins la populacion mondiala.
L’esfòrç es estat fach per soslinhar la categoria de las personas subregrassas –overfat en anglés– en tot confirmar que son d’individús qu’an un excès de grais corporal que pòt afectar lor santat. L’article vent d’èsser publicat dins lo periodic Frontiers in Public Health.
De nòvas donadas inquietantas
Segon las nòvas donadas qu’an permés d’arribar a aquesta conclusion i a fòrça gents sus la planeta que, sens èsser consideradas uèi lo jorn coma subregrassas, o poirián èsser lèu pr’amor que lor pes fa de temps qu’a quitat d’èsser normal. “Pel primièr còp dins l’istòria de l’umanitat, lo nombre de personas subregrassas es superior al nombre de personas primas –çò diguèt Maffetone–. Aquò poiriá provocar un problèma mondial encara mai grand, çò es una pandemia planetària de personas subregrassas restacada amb de problèmas metabolics a respècte d’un excès de pes en relacion a la massa corporala de l’umanitat”.
Totun, l’estudi reconeis que fòrça individús que son estats classats coma subregrasses an pas d’èsser obligatòriament de personas grassas o obèsas. Lo classament scientific es estat realizat sus la basa de l’indici de massa corporal, segon la classificacion medicala actuala de persona grassa o subregrassa.
“E aqueste estudi poiriá èsser solament la poncha de l’icebèrg per rapòrt a la populacion grassa que i a uèi lo jorn dins lo Mond –çò volguèt soslinhar Maffetone–. Avèm volgut avertir la populacion mondiala dels risques qu’aquesta situacion pòt menar. E sabèm, totun, que las definicions de gras e subregras son relativas”.
La còla scientifica qu’a efectuat l’estudi a volgut tanben far mai comunas las definicions d’aquela mena, pr’amor que pensan qu’aquò poiriá melhorar la santat mondiala. E pr’aquò an confirmat que solament entre un 9% e un 10% de la populacion de la planeta es prima.
“E mai se quand pensam a la condicion de prim, pensam totes a la fam, las chifras d’aquela mena de personas davalan lèu –çò afirmèt Maffetone –“. Aquò laissariá pas qu’un 14% de la populacion mondiala amb un percentatge còrs-grais normal.
A mai, los scientifics australians e neozelandeses an alertat sul ligam possible d’aquela situacion amb l’aument de malautiás cronicas e sus un còst per la santat mondiala plan mai naut. Se pòt parlar doncas d’una vertadièra pandemia mondiala qu’afècta de personas de totas las edats e de totas las classas socialas. Sèm avertits.
La Redaccion
Aqueste article serà tanben publicat dins Jornalet , lo primièr quotidian en linha de lenga occitana, amb lo qual Sapiéncia a un acòrdi de cooperacion.
