Home LINGÜISTICA L’ESTAT INDIAN D’ASSAM FA OFICIAL LO SANSCRIT
L’ESTAT INDIAN D’ASSAM FA OFICIAL LO SANSCRIT

L’ESTAT INDIAN D’ASSAM FA OFICIAL LO SANSCRIT

0
0

Aital o a fach public lo ministre d’educacion de l’estat indian d’Assam : lo sanscrit , l’anciana lenga indó qu’aguèt una edat d’aur fa 1500 ans serà matèria obligatòria a l’escòla. L’anonci es estat fach après las contunhas demandas d’activistas del Partit Bharatiya Janata e d’autras organizacions nacionalistas indós.

Segon los aimants d’aquesta anciana e sagrada lenga indiana aquò poiriá èsser lo principi d’una nòva edat d’aur de la cultura tradicionala indó.

Lo sanscrit, lenga culturala de l’anciana Índia, serà doncas ensenhat, de moment, als darrièrs corses de l’escòla de l’estat indian d’Assam. Mas l’intencion es tanben l’ensenhar als primièrs corses, als mai pichons, per ajudar en la difusion d’aquesta lenga, que uèi lo jorn, e segon lo cens de l’an 2001, auriá entre 14.000 e 50.000 indians parlaires.

La demanda èra estada realizada per divèrses grops d’activistas indós dempuèi d’annadas pr’amor que pensan qu’es una manièra d’aver unes ligams mai foòrts amb la civilizacion precoloniala indiana. Totun, que la nòva mesura solament poirà èsser aplicada al sistèma escolar públic d’Assam e pas a totas las escòlas d’aquel estat. Per poder far efectiva la nòva lei, l’estat indian d’Assam ja a anonciat tanben que lèu començarà l’ensenhament de mai de 56.000 professors per poder arribar a bon pòrt.

D’autras lengas de l’estat indian d’Assam, coma l’assamés o tanben d’autras lengas regionalas coma lo bodo o lo bengalin seràn, totun, ensenhadas en las escòlas privadas. Aquestas auràn tanben un ensenhament garantit pr’amor que la majoritat dels estats indians ensenhan normalament tres lengas; la lenga regionala o locala, l’indó e l’anglés.

Primièras reaccions negativas

L’anonci a fach pas contents totes los escolars. Divèrsas organizacions d’estudiants d’Assam s’an mostrat contraris a l’anonci del govèrn d’Assam pr’amor que confirman que i a fòrça escòlas en aquel estat ont s’ensenhan pas las lengas indigènas maugrat èsser fòrça parladas en la region. “Volèm pas recebre l’ensenhament del sanscrit a l’escòla – çò diguèt Jyoti Gogoi, secretari general del Sindicat d’Estudiants Tot Assam -. A la nòstra comunautat degun parla sanscrit”.

Lo sanscrit , l’anciana lenga indó qu’aguèt una edat d’aur fa 1500 ans serà matèria obligatòria a l’escòla a Assam, Índia.

Al delà, Kamrul Islam Chandhary, secretari del Sindicat Nacional d’Estudiants d’Índia en Assam afirmèt que” paucs professors pòdon ensenhar la lenga sanscrita e que cal far una granda inversion per o far possible”. Al parlament estatal d’Assam, de mai, los partits de l’oposicion afirmèron que los escolars ja an pro matèrias e que çò qu’èra realament necessari èra aver matèrias practicas per la vida vidanta e pas l’ensenhament d’una lenga anciana.

D’un autre costat, lo ministre d’educacion d’Assam, Himanta Biswa Sarma, diguèt qu’amb lo sanscrit tanben i auriàn nòvas matèrias al sistèma escolar public d’Assam coma las sciéncias e l’informatica e que sus aquò pas degun aviá pas dich res. De mai, volguèt confirmar que l’introduccion de l’ensenhament a l’escòla publica d’Assam aviá un grand supòrt social e que se i aviá gent contrària èra per una marrida comprension de çò qu’aviá anonciat lo govèrn. “Son pas contraris a la decision governamentala – çò diguèt – mas a la manièra cossí serà implementada aquesta decision”.

L’anonci, qu’es estat tanben celebrat pels aimants d’aquesta anciana e sagrada lenga indiana e que poiriá far renàisser la meteissa, serà “lo principi d’una nòva edat d’aur de la cultura tradicionala indiana – çò confirmèt lo ministre -.

Totun, los representants dels sindicats d’estudiants contunhan en tot demandar un dialòg amb lo govèrn pr’amor que “l’ensenhament del sanscrit auriá pas de relevar l’ensenhament d’autras lengas localas, qu’es çò de mai practic per la populacion d’Assam- çò diguèron”.

La Redaccion

LEAVE YOUR COMMENT

L'adreça electrònica no es publicarà. Els camps necessaris estan marcats amb *