Home ISTÒRIA L’ESPÈCIA FANTAUMA
L’ESPÈCIA FANTAUMA
0

L’ESPÈCIA FANTAUMA

0
0

De recentas descobèrtas dins l’istòria evolutiva de la saliva umana e de sas proteïnas soslinhan qu’Homo sapiens sapiens se crosèt amb d’autras espècias en divèrses luòcs de la planeta e que i aguèt una autra espècia uèi totalament desconeguda. Una espècia fantauma.

D’efièch, la sciéncia a pogut ara demostrar qu’existiguèt una espècia umana arcaïca qu’auriá contribuït amb son material genetic a la creacion evolutiva de nòstra espècia d’ara. Lo crosament se seriá debanat amb la populacion negra d’uèi lo jorn mas fa de milièrs d’ans. E la recèrca permet d’afirmar que los rescontres sexuals entre las desparièras espècias ancianas d’umans serián estadas comunas.

De crosaments preïstorics

La nòva espècia poiriá ben èsser un ominid nòu o una sosespècia d’Homo erectus.

Ja èran estats realizats plusors estudis scientifics anteriors qu’avián una conclusion parièra: nòstra espècia, en tot intrar en Asia e Euròpa, aviá fach de crosaments amb d’autras espècias d’ominids. Òr, un nòu estudi confirmariá qu’aqueles crosaments tanben foguèron abituals en Africa amb d’autras espècias ominidas.

“Se pòt dire que los crosaments entre espècias ominidas ancianas foguèron pas una excepcion mas la nòrma, çò diguèt Omer Gokcuman, professor de biologia a l’Universitat d’Arts e Sciéncias de Buffalo, dins l’estat de Nòva York. Avèm fach l’estudi a travèrs de l’analisi d’una proteïna presenta dins la saliva umana apelada MUC7. En tot estudiar son istòria genetica, avèm trobat la signatura de diferentas espècias dins la populacion de la nomenada Africa negra d’uèi lo jorn”.

L’estudi es estat publicat dins la revista numerica Molecular Biology and Evolution. Los scientifics que l’an realizat volián conéisser l’origina de la proteïna MCU7 e, per ansin, estudièron la saliva de mai de 2500 umans modèrnes. Mas i trobèron de genòmas desparièrs dels de la populacion umana d’autres luòcs de la planeta.

Segon l’estudi lo crosament se seriá debanat amb la populacion negra d’uèi lo jorn mas fa de milièrs d’ans.

La varianta genetica trobada èra tan distinta que los gèns neandertalians e denisovans, per comparason, èran mai parièrs als de nòstra espècia qu’aqueles trobats dins la populacion subsahariana. “La soleta explicacion, çò confirmèt Gokcuman, es l’introduccion genetica d’una nòva espècia fantauma arcaïca. Poiriá ben èsser una espècia qu’encara a d’èsser descobèrta, un ominid nòu o una sosespècia d’Homo erectus. Li disèm fantauma pr’amor qu’encara son pas estats trobats los fossils”.

En tot estudiar lo ritme de mutacion genetica, la còla qu’a realizat l’estudi a pogut estimar que los ancessors umans qu’avián la varianta MCU7 subsahariana se crosèron amb d’autras espècias fa solament 150 000 ans mas puèi que las doas espècias evolucionèron de manièra divergenta fa entre 1,5 e 2 milions d’annadas.

L’estudi d’aquela proteïna dins la saliva umana, MCU7, es estada considerada fòrça importanta pr’amor qu’es la proteïna que balha las defensas bacteriologicas a l’espècia umana dins la saliva. E mai d’un crosament genetic l’auriá fach venir plan mai fòrta e resistenta .

La Redaccion

Aqueste article serà tanben publicat dins Jornalet , lo primièr quotidian en linha de lenga occitana, amb lo qual Sapiéncia a un acòrdi de cooperacion.

Christian Andreu Nasquèt a Barcelona en 1972, estudièt jornalisme a l’Universitat Autonòma de Barcelona e son especialitat es la politica internacionala. Parla uech lengas dont l'occitan. A publicat lo libre Art i Lletres a Horta-Guinardó e a collaborat totjorn amb de jornals catalans, bascos e occitans coma La Veu del carrer, El Punt, Egin, A vòste e Jornalet. Es maridat, a dos enfants, Jana e Roger, e demòra a Reus.

LEAVE YOUR COMMENT

L'adreça electrònica no es publicarà. Els camps necessaris estan marcats amb *