Home ISTÒRIA LEIS OMININS D’ATAPUERCA ÈRAN NEANDERTALIANS
LEIS OMININS D’ATAPUERCA ÈRAN NEANDERTALIANS
0

LEIS OMININS D’ATAPUERCA ÈRAN NEANDERTALIANS

0

Despuèi 1984 s’an fach d’excavacions contunhas en Atapuerca e a la Sima de los Huesos (Trauc deis òsses). E s’an poscut recuperar fins a 28 esqueletas entieras d’individús que demorèron en Euròpa fa 430.000 annadas. Tanta informacion aviá d’èstre provada geneticament. Faliá saber s’aquestos ominins èran familha de neandertalians o de denisovans. E ara, un estudi dau sieu ADN v’a descobèrt.

8150_1
Fins encuei non se sabiá se l’ominin que demorèt a Atapuerca èra neandertalian ò denisovan.

La recerca scientifica es estada facha per Mathias Meyer, cap d’una còla d’antropològs de l’Institut Max Planck d’Antropologia Evolucionaria. E la conclusion es qu’èran mai familha de neandertalians que non de denisovans. Ansinta, s’es prepausat de lei classificar coma ancians neandertalians e s’es vist que la sieuna preséncia pendent lo Plestocèu Mièg foguèt importanta per lo desenvolopament posterior de neandertalians en Eurasia tota.

L’estudi s’es vist publicat dins la revista Nature e a poscut determinar que leis ominins de Sima de los Huesos, un dei sites arqueologics mai grands e importants de la planeta tota, èran lei premiers neandertalians que l’aguèron en Euròpa. Lei divergéncias entre espècias se debanèron doncas davant de fa 430.000 ans.

Aujòus de neandertalians

“Avèm agut sequéncias d’ADN de dos individús que confirman que leis ominins de Sima de los Huesos èran mai pròchis de neandertalians que non de denisovans – çò diguèron lei scientifics -. Aquò es una pròva que la divergéncia coma espècias entre neandertals e denisovans es pus anciana que 430.000 ans “.

08d35-homoheidel_22_h-300x191
Geneticament, la desparietat entre lei doás espècias umanas començèt fa mai de 430.000 ans.

Pasmens Svante Pääbo, de la còla scientifica qu’a fach aquest estudi genetic prepausa qu’aquesta divergéncia benlèu se debanèt fa entre 550.000 e 750.000 ans. Aquesto temps seriá la desparietat entre umans modèrns e ancians.

En delai d’aquò, la còla d’antropològs de l’Institut Max Planck a vougut soslinhar que, maugrat que l’isolament genetic èra una pròva fòrça malaisida de far, lo bon estat deis òsses trobats e lo bon trabalh deis arqueològs pendent leis excavacions an ajudat fòrça per far leis analisis geneticas.

La Sima de los Huesos es un site arqueologic a Atapuerca, estat espanhòu, que l’an trobat mai de 7.000 fossils d’ominis e divèrsas esqueletas entiera. Se fins encuei èran nomenats coma ominins d’Atapuerca ara ja pòdon èstre nomenats fin finala coma de neandertalians.

Redaccion