Home DIVÈRSES LAS PLANTAS FAN VIURE MAI LONGTEMPS
LAS PLANTAS FAN VIURE MAI LONGTEMPS
0

LAS PLANTAS FAN VIURE MAI LONGTEMPS

0
0

Tala es la conclusion d’un nòu estudi scientific qu’a analisat las condicions environamentalas de mai de 100.000 femnas estatsunidencas. Segon l’estudi, las femnas qu’avián de plantas prèp de lors ostals –plantas o arbres o qué que siá vegetacion– aguèron un 12% de mens de mortalitat pendent lo periòde estudiat que las femnas qu’an pas de vegetacion a proximitat.

L’estudi a demostrat que d’aver de plantas a l’entorn de l’ostal afècta la mortalitat dels umans.

“La conclusion de l’estudi es mai qu’importanta –çò diguèt Linda Birnbaum, directritz de l’Institut Nacional de Sciéncias de la Santat Environamentala estatunidenca e mecèna de l’estudi-. La descobèrta d’una mendre mortalitat dins los umans pr’amor de la vegetacion poiriá èsser clau per la santat umana dels ans venents”.

L’estudi a amassat divèrses cercaires dels espitals de Boston e Brigham, qu’an estudiat pendent mai de uèch ans lo nivèl environamental de mai de 100.000 femnas que demoravan pertot als Estats Units. Las femnas, que trabalhavan tanben dins d’espitals, balhèron lors adreiças e los scientifics utilizèron d’imatges per satellit per determinar quantas plantas i aviá dins los 250 mètres mai pròches de lors ostals.

Mai de vegetacion, mens de mòrts

Aital, l’estudi a pogut confirmar que la preséncia d’una vegetacion mai abondosa pòt èsser restacada directament amb un indici mendre de tota sòrta de mòrts (franc de las mòrts accidentalas). Las femnas que demoravan en de luòcs ont i aviá mai de vegetacion patissián fins al 4% de mens de mortalitat per las malautiás de fetge, fins al 34% de mens de mortalitat per las malautiás respiratòrias e fins al 13% de mens de cancèrs, e tot èra comparat amb de femnas que demoravan dins de zònas ont i aviá fòrça mens de vegetacion.

Segon la còla qu’a fach l’estudi, i pòt aver un grand nombre de rasons per explicar perqué la vegetacion prèp de l’ostal poiriá ajudar a viure mai longtemps. Entre aquestas, i a la quita vegetacion qu’ajuda a l’activitat fisica o sociala, mens d’estransi e de depression, e un melhor contacte amb la natura.

Las femnas qu’avián de plantas prèp de lors ostals aguèron un 12% de mens de mortalitat pendent lo periòde estudiat que las femnas qu’an pas de vegetacion a proximitat.

Totun, aqueste estudi tanben a pogut restacar coma causa dirècta d’un nivèl mendre de depression pels umans lo fach d’aver mai de vegetacion prèp dels ostals. E mai, aquò ajuda a desvolopar la socialibilitat o l’ajuda a la comunautat, coma far la caritat. Las femnas qu’avián mens de vegetacion prèp de l’ostal, çò soslinhèt l’estudi, avián un percentatge mai grand de mortalitat e fòrça mens d’activitats socialas.

L’estudi, que foguèt realizat sus mai de 110 000 femnas estatunidencas entre los ans 2000 e 2008, a balhat la conclusion que d’aver de plantas a l’entorn de l’ostal afècta la mortalitat dels umans. Malgrat aquò, tanben an volgut confirmar que i a d’autres factors importants en aquesta mortalitat coma l’edat, l’origina etnica o los revenguts de las personas estudiadas. L’estudi es ara publicat dins la revista Environmental Health Perspectives.

La Redaccion

Aqueste article serà tanben publicat dins Jornalet , lo primièr quotidian en linha de lenga occitana, amb lo qual Sapiéncia a un acòrdi de cooperacion.

LEAVE YOUR COMMENT

L'adreça electrònica no es publicarà. Els camps necessaris estan marcats amb *