Home PALEONTOLOGIA DE LÀMIAS CANIBALAS DE FA 300 MILIONS D’ANS
DE LÀMIAS CANIBALAS DE FA 300 MILIONS D’ANS

DE LÀMIAS CANIBALAS DE FA 300 MILIONS D’ANS

0

La descobèrta de la canibalizacion de làmias que demorèron entre Euròpa e America fa 300 milions d’ans es totjorn estonanta. Aquò es çò qu’a trobat una còla scientifica en tot analizar los coprolits d’un verdon que visquèt fa 300 milions d’ans, Orthacanthus. L’estudi es estat publicat dins Paleontology.

Son de pròvas macabras, mas scientificas. L’estudi dels coprolits d’Orthacanthus, una làmia de mai de 3 mètres de long que visquèt arunan, mòstran qu’èran d’animals canibals. Sembla, segon dison los paleontològs, que tanben minjavan de pichons Orthacanthus quand patissián fauta de noiridura.

En aquela epòca Euròpa e America del Nòrd èran en l’equador de la Tèrra e èran colonizadas per de selvas. Totun, los predators ,mai grands de l’epòca èran pas d’animals terrèstres mas grandas làmias que vivián en de paluns prèp de la còsta. La trobalha fòssil es estada trobada en las forèsts de Nòva Brunswick, en Canadà.

Una trobalha extraordinària

Atal, la tròba d’aqueste comportament dels Orthacanthus es estada realizada per Aodhán Ó Gogáin, del Collègi Trinity de Dublin. El meteis confirma qu’es un comportament animal sonat canibalisme filial. “Avèm encontrat de pròvas dels continguts estomacals fossilizats d’Orthacanthus – çò diguèt – qu’aqueste peis-can minjava d’amfibis e peis mas que tanben minjava pichons de sa pròpia espècia quand non trobava autra causa per minjar”.

Las pròvas son dents de pichon Orthacanthus trobadas en de coprolits fossils d’aqueste peis-can escantit. Mike Benton, professor de l’Universitat de Bristol (Anglatèrra) assegura que, de còps, “los paleontològs pòdon pas espiar las relacions dirèctas en la manièra que o pòt far un zoològ. Aquestes an de metòdes desparièrs e amb aquels pòdon interpretar los malhums de noiridura d’animals escantits – çò apondèt -. Un d’aquestes metòdes es l’analisi dels coprolits e aquò es çò qu’avèm fach”.

“Sabèm pas encara, totun, perqué Orthacanthus minjava de pichons de la sieuna espècia – çò diguèt Howard Falcon-Lang, de l’Universitat de Londres e cap de l’estudi -. Lo Carbonifèr foguèt un periòde pendent lo qual de peisses començavan de colonizar l’aiga fresca dels paluns. Benleù Orthacanthus utilizava aquestes per criar los pichons e los minjava quand ja i aviá pas mai de noiridura”. Aital la descobèrta es venguda de las estonantas.

Christian Andreu*

*Dempuèi uèi trobarètz una pichona biografia dels redactors de Sapiéncia en la seccion Qui sèm.

Christian Andreu Nasquèt a Barcelona en 1972, estudièt jornalisme a l’Universitat Autonòma de Barcelona e son especialitat es la politica internacionala. Parla uech lengas dont l'occitan. A publicat lo libre Art i Lletres a Horta-Guinardó e a collaborat totjorn amb de jornals catalans, bascos e occitans coma La Veu del carrer, El Punt, Egin, A vòste e Jornalet. Es maridat, a dos enfants, Jana e Roger, e demòra a Reus.