La pression de la pesca de cèrtas espècias de làmia es venguda de mai en mai granda pendent los darrièrs ans. Segon divèrses estudis, la sopa d’aleta de làmia n’es una de las principalas causas. Un d’aqueles estudis arriba d’alertar que cal cambiar las abituds dels consumaires o desenats d’espècias de làmias s’escantilharàn lèu.
Las donadas que balhan los estudis confirman que la pesca annadièra de làmias arriba ja a pus d’un milion de tonas. Aquò es sièis còps mai que fa 60 annadas. Afirman tanben que uèi lo jorn ja se patís una subrexplotacion e qu’aquò es un vertadièr perilh per mai de 60% de las espècias de verdons de la planeta tota. Pr’aquò demandan d’accions legalas que, avisan, pòdon demorar d’annadas, e, al còp, un cambi dins las abituas dels consumaires pr’amor que, se non, l’extincion de la majoritat de làmias dels oceans arribarà e força lèu.
Segon Yvonne sadovy, un dels cercaires qu’a participat en un d’aqueles estudis, “la subrexplotacion de pesca que patisson uèi lo jorn las desparièras espècias de làmias que i a en la planeta pòt entraïnar la desaparicion de la majoritat d’aquelas pr’amor qu’es la proporcion mai nauta patida per un grop de vertebrats marins dins la planeta”.
Lo mai grand pòrt receptor de carn de làmia
Lo cercaires confirmèron que Hong Kong es, uèi lo jorn, lo mai grand pòrt receptor de pesca de verdon de la planeta pr’amor que recep mai de la meitat de la pesca de làmia de la Tèrra e aquò arriba legalament: fins a 6.000 tonas annadièras. “Totun, un estudi demostrèt que, en 2017, fins 33% d’aquela pèsca èra sus d’espècias de làmias en dangièr d’extincion – çò diguèt Sadovy -. Aquò es atal pr’amor que solament 12% de las pesca de làmias es facha en de luòcs sostenibles e çò fa que pus de 25.000 tonas annadièras arriben de luòcs de pesca legalas.
Atal, los cercaires d’aquel estudi volguèron soslinhar que las làmias son 25% de tota la pesca de ton e peis-espasa en divèrses païses e que la majoritat de l’industria de pesca de verdon realiza de practicas criminalas que pòdon pas èsser acceptadas per los desparièrs govèrns. En Indonesia la pression sus las làmias es plan granda , amb mai de 100.000 tonas annadièras. Puèi venon Índia e l’estat espanhòl, e Taiwan, que vendon de milions de tònas de carn de làmia als mercats internacionals, mai que mai a China.
Segon tot aquò, los scientifics demandèron los consumaires d’actuar amb de responsabilitat e decidir que pòt contunhar d’èsser acceptat o pas se la carn de verdon èra pescada de manièra illegala. Qualqu’unas espècias, dison, an arribat a un declin de 90% de tota l’espècia per las importacions chinesas de sopa de làmia.
“Lo dangièr d’extincion de las làmias solament serà arrestat se los consumaires càmbian las abituds. Las leis arribaràn ja tròp tard – çò alertèt Sadovy –“. L’estudi foguèt publicat al numeric Marine Policy.
La Redaccion
