Home DIVÈRSES LA RECUPERACION DEL TIGRE DE SUMATRA
LA RECUPERACION DEL TIGRE DE SUMATRA
0

LA RECUPERACION DEL TIGRE DE SUMATRA

0

Paucas notícias positivas pòdon èsser balhadas uèi lo jorn sus l’estat de la fauna mondiala. E mens encara quora plusors scientifics an avisat ja que sèm en las pòrtas d’una nòva extincion de flora e fauna a nivèl mondial. Pr’aquò saber que lo tigre de Sumatra tòrna créisser amb santat en aquela illa es un fach mai que planvengut.

E mai se la populacion mondiala de tigres de Sumatra foguèt compresa en la lista d’espècias criticas de l’UNESCO en l’an 2008. Aquel an lo tigre de Sumatra aviá solament una populacion critica d’entre 440 e 680 especimèns. E la tendéncia èra marrida pr’amor qu’en 1978 n’i avián 1.000, l’an 1985 800 especimèns e l’an 1992 solament 500.

Las darrièras donadas confirman un fach estonant : lo tigre de Sumatra poiriá laissar d’èsser una espècia critica.

Totun, que la Societat de Conservacion de la Fauna Sauvatge (WCS) e las autoritats del Pargue Nacional Bukit Barisan d’aquela illa an confirmat que la populacion de tigres es a mand de se recuperar pauc cha pauc: la densitat d’especimèns es màger ara qu’abans e aquò maugrat las menaças contunhas de braconaires e paisans que i vivon prèp.

E mai quand l’espècia de tigre de Sumatra (Panthera tigris sumatrae) es una espècia de tigre en situacion critica que demora solament en aquela illa indonesiana. Es tanben la soleta espècia de tigre que demora en una illa e pas al continent pr’amor que d’autras espècias que tanben i demoravan, coma lo tigre de Java e de Bali son ja desaparegudas.

Plusors menaças meton en dangièr aquela espècia de tigre actualament: a de besonh mai de 25.000 ectaras per viure plan e es encara persecutat per de braconeires per la sieuna pèl, òsses e d’autres partides del còrs. De mai, los conflictes amb los paisans se debanan sovent e i a una constanta pèrda de predas e abitat.

Maugrat aquò, l’autoritat del Pargue Nacional Bukit Barisan en Sumatra, un pargue situat prèp de la còsta, situèt mai de 120 camèras dins 1000 Km2 de bòsc e sèuva per los estudiar e aguèt una resultas que balhan un pauc d’espèr per lo futur de l’espècia.

L’estudi scientific mostrèt que la densitat de la sieuna populacion es crescuda d’1,6 tigres/100 Km2 en 2002 a 2,8 tigres/100 Km2 en 2015. E mai, la proporcion de mascles es femelhas es d’1 a 3, una situacion ideala segons los recercaires per una lèu recuperacion de la populacion de tigres dins lo pargue.

“Aquela proporcion de tigres dins lo pargue mòstra las bonas condicions de santat e reproduccion del tigre de Sumatra dins plan airals estudiats, çò diguèt Wulan Pusparini, recercaire del WCS. Amb l’estudi, apondèt, avèm pogut confirmar la bona situacion de la populacion de tigres e cossí dintran al pargue los braconaires”.

Lo tigre de Sumatra es la sosespècia de tigre insulara mai pichona d’Asia. E abita solament en aquela illa.

Per Timbul Batubara, cap de la direccion del pargue Bukit Barisan, “la nòva situacion amb mai de tigres es la resulta de l’esfòrç fach per las patrolhas de policièrs rurals que, amb l’ajuda d’organizacions coma WCS, a pogut liurar fòrça trapas e arrestar una pèrda d’abitat”.

“Es un sòmi fach realitat per totes los conservacionistas d’Indonesia – çò diguèt Noviar Andayani, director de WCS en Indonesia-. Las autoritats del pargue an trabalhat plan amassa amb los nòstres recercaires e avèm pogut protegir l’abitat del tigre e iniciar una nòva tendéncia positiva que poiriá quitar aquela espècia de la lista d’espècias en situacion critica de l’UNESCO en un futur pròche”.

Una tendéncia generala

Lo tigre de Sumatra es la soleta espècia de tigre insular que demora uèi lo jorn en Asia pr’amor que n’i a pas pus en Bali o Java. De mai, es una espècia geneticament desparièra d’autras espècias de tigre continental en Asia pr’amor que se desseparèt d’aqueles fa entre 12.000 e 6.000 ans, pendent lo Pleistocèn, quand lo nivèl de la mar separèt Sumatra del continent asiatic.

Las sieunas caracteristicas geneticas e morfologicas son doncas especialas. La sieuna pèl es diferenta de la del tigre de Bengala pr’amor qu’es mai escura e las franjas son mai amplas. Los mascles fan entre 100 e 140 Kg e entre 2,2 e 2,5 mètres de longor. Las femelhas, totun, son un pauc mai pichonas e lo sieu pes vària entre los 75 e 100 Kg. Aquò fa de l’espècia de Sumatra una de las sosespècias mai pichonas de tigre. Las sieuna talha es mai prèp d’un leopard o un jaguar que non d’un tigre siberian.

Tradicionalament demoran en tota sòrta d’abitats: prèp de la còsta (ont i a lo pargue e Bukit Barisan Seletan ) e tanben en nautas montanhas (ont i a la Pargue Nacional de Gunung Leuser, a 3.200 mètres).

La luta del govèrn indonesian contra los braconaires a permés ajudar en la recuperacion d’aquela espècia.

Pendent las annadas 90 la populacion de l’espècia èra pas encara marrida pr’amor que solament al Pargue Nacional de Kerinci Seblat i avián mai especimèns qu’en tot Nepal, China, Laos, Cambòtja e Vietnam. Totun, los prèp de 200 tigres que i demoravan ja èran una populacion en declin.

Fa prèp de dètz annadas, en 2008, la densitat de tigres de Sumatra dins lo Pargue Nacional de Tesso Nilo ja mostrèt una tendéncia positiva amb 1,70 tigres/100 Km2 restacat amb 0,90 tigres/100 Km2 en 2005. Per ansin, aquela recuperacion restaria associada amb la granda riquesa de fauna de l’airal. Aital, lo tigre de Sumatra manja de monards, de tapirs, de pòrcs, de cèrvis nans, cèrvis de Sambar e cèrvis indians e lo sieu bon nombre a ajudat lo tigre de Sumatra se recuperar e cambiar la tendéncia. Esperam qu’aquò siá pas una flor d’estiu e pro.

Christian Andreu*

*Dempuèi uèi trobarètz una pichona biografia dels redactors de Sapiéncia en la seccion Qui sèm.

Christian Andreu Nasquèt a Barcelona en 1972, estudièt jornalisme a l’Universitat Autonòma de Barcelona e son especialitat es la politica internacionala. Parla uech lengas dont l'occitan. A publicat lo libre Art i Lletres a Horta-Guinardó e a collaborat totjorn amb de jornals catalans, bascos e occitans coma La Veu del carrer, El Punt, Egin, A vòste e Jornalet. Es maridat, a dos enfants, Jana e Roger, e demòra a Reus.