Son rares lo monde auei qu’an jamai auvit parlar de meditacion. Sovent, la practica de la meditacion es ligada dins l’imaginari collectiu a l’espiritualitat e las religions orientalas, bodisme prumier o ben indoïsme o taoïsme. Totparier, pòden tanben trobar de las practicas meditativas dins lo cristianisme, jos la forma de contemplacion, o dins l’islam, dins lo sofisme. Per de verai, un fum de practicas meditativas s’es desvelopat aura dins lo monde laïc, mai o mens ortodòxas, daus còps en liam emb lo corrent New-Age.
Pendent longtemps, l’i a ‘gut una mesfiança dau monde scientific a l’encontra de la meditacion que considerava coma una practica irracionala pròpa a la cresença religiosa e fòrça eslunhada de tota recercha seriosa. Pertant, dempuei quauquas annadas, los cerchaires an començat de préner en compte los tesmonhatges daus practicants que disen tots los benfachs tant fisics coma psichics que lor a menat una practica regulara de la meditacion.
Las quitas terapias comportamentalas e cognitivas, utilizadas en psiquiatria e psicologia, an integrat dins lor tresesma ondada una forma de meditacion dicha de “plena consciénciaˮ (mindfulness en anglés) derivada de la meditacion de “calme mentauˮ (śamatha en sanscrit, shine en tibetan) dau bodisme.
Qu’es entau que daus cerchaires an vougut estudiar recentament çò que se passa dins lo cerveu daus practicants dau temps de la meditacion. Lo plan conegut interpreta dau Dalai-Lama en França, Matthieu Ricard, fuguet notadament lo cobai d’una experiéncia que se menet en mai de 2015 a l’Universitat de Lieja en Belgica. Fau precisar que Matthieu Ricard fai partida dau grope Mind and Life Institute enginjat per lo Dalaï-Lama per far se rescontrar sciéncia e bodisme e que s’era desjà prestat a l’exercici en quauqu’uns luecs mai per lo monde, notadament a l’Universitat de Princeton (USA), de Berkeley (USA) o denguera de Lyon (França). Matthieu Ricard fuguet sosmés pendent dos jorns per un neurològ dau centre ospitalier universitari de Lieja ad una exploracion dau cerveu per IRM, entre autra tecnica de mesura neuroscientifica, dau temps que meditava.
L’objectiu de quela experiéncia era d’examinar coma lo cerveu reagís a daus estimuli pendent la meditacion, un bruch fòrt per exemple o ben daus còps sus la testa, e donc de metre en evidéncia o pas daus estats de consciéncia pròpes a la meditacion. Quelas experiéncias, coma la que l’i participet Matthieu Ricard, an constatat de las reaccions aus estimuli plan inabitualas ordinàriament chas lo monde tant qu’a la percepcion dau defòra e de se-mesma. Matthieu Ricard s’es mostrat en capacitat de modular sos estats de consciéncia emb una aisança de las grandas en plena luciditat en segre las directivas que li eran balhadas, coma de s’endurmir prigondament sens esfòrç per exemple.
En mai, an mesurat una proporcion d’ondas gamma emesas per lo cerveu de Matthieu Ricard fòrça elevada, ondas que jugan un ròtle dins lo ben-èsser. D’autras experiéncias sus d’autres meditants an relevat una densificacion de la matèria grisa dins l’amigdala e una reduccion dins l’ipocamp, çò qu’es lo signe d’una diminucion generala de las paurs e angoissas. Matthieu Ricard precisa que practica la meditacion d’un biais intensiu e que qu’es subretot question d’entrainament personau, que chascun pòt far, per ‘ribar a quilhs resultats.
Per ‘chabar, la practica regulara de la meditacion sembla donc capabla de causar una reorganizacion generala dau cerveu devers una responsa mai mesurada e distanciada aus estimuli exteriors. Los estudis sus la meditacion son a se persegre emb plen de gent per lo monde per ne’n saubre mai.
http://www.slate.fr/story/101687/meditation
Joan-Cristòu Dourdet es ensenhaire-cerchaire en linguistica e afogat d’occitan dempuèi sos vint ans, (comença de far un bocin de temps aura). Nascut en Lemosin, ente viu d’enguera, dins lo país aredian, a auvit la lenga occitana dins la familha e la bela familha (que es maridat lo paubre) çò que l’i fai totjorn quauquas enchaisons de las bonas de bargassar coma/emb los beus-parents qu’an l’occitan coma linga prumiera.
Milita per la causa animala e minja pas mai charn que peisson, produchs dau lach o ben uòus (se pòt dire que es vegan), e es per aquò que nos farà lo plaser d’escriure daus articles sus la condicion animala e lo vegetar/lisme.
