Home PALEONTOLOGIA LA DECADÉNCIA DELS DINOSAURES
LA DECADÉNCIA DELS DINOSAURES

LA DECADÉNCIA DELS DINOSAURES

0

Fins ara la paleontologia aviá pensat que los dinosaures èran plan evolucionats fins a arribar d’èsser los sénhers de la planeta fins a la casuda del meteòr fatal fa 65 milions d’ans, un nòu estudi questiona la sieuna evolucion e confirma que ja èran en declin fasiá de desenats de milions d’ans.

End_of_Dinos
Segon un nou estudi los dionsaures èran ja en plen declin quan i aguèt lor extincion.

Aital, e segon las paraulas dels paleontològs qu’an fach lo nòu estudi, se pòt arribar pensar que la fin dels dinosaures èra inevitabla e que la casuda d’un meteòr en la peninsula de Yucatan solament accelerèt la sieuna extincion.

Coma pròva, l’estudi soslinha que la decadéncia foguèt mai importanta segon las espècias. Sauropòds gigants de còl long aguèron una declin fòrça mai leù que d’autras espècias de dinosaures. D’autres, coma los terapòds (ont s’includís T. Rex) aguèron un declin pas tan ponchut.

Analisi de la informacion fossila

L’estudi es estat fach per una còla de scientifics de las universitats de Reading e de Bristol, a Anglatèrra. Après analizar tota la informacion fossila e far d’estatisticas, s’es podut confirmar que los dinosaures èran ja d’animals en declin prigond e fòrça abans de la sieuna extincion totala, ara fa 65 milions d’ans.

10-Dinosaur-Facts-and-Records-2
Non s’especializèron e non poguèron sobreviure la granda crisi environamentala de fa 65 milions d’ans.

“Esperavam pas aqueste resultat – çò diguèt Manabu Sakamo, cap de l’estudi – e maugrat qu’es segur que lo còp del meteòr  foguèt la causa mai importanta en l’extincion dels dinosaures, ja fasiá temps qu’evolucionavan pas e que s’aurián escandit amb o sens de meteòr”.

Al delà d’aquò, l’estudi a d’ajudar a compréne la fin de las espècias animalas per rapòrt a la situacion actuala e futura de la biodiversitat qu’a la Tèrra uèi. Aquò es fòrça mai important en se saber que i a fòrça espècias animalas a mand de desaparéisser pr’amor del cambi environamental causat per l’òme.

“Totas las evidéncias confirman que los dinosaures, qu’avián mestrejat totes los escosistèmas terrèstres pendent mai de 150 milions d’ans – çò confirmèt Mike Benton , tanben cap de l’estudi – perdèron l’abilitat de s’especializar. Aquò auriá ajudat en la sieuna fauta d’abilitat per se poder recuperar d’una crisi environamentala coma la que i aguèt pendent la casuda del meteòr”.

Aquesta crisi provoquèt – la casuda del meteòr – l’espandiment de milions de tonas de polsa, la fauta de lum del solelh e la mòrt de tota la vegetacion pr’amor d’una casuda generala de la temperatura. De primièr moriguèron los dinosaures erbivòrs e après tanben los predadors.

“Aqueste declin auriá laissat lòc pendent de milions d’ans – çò soslinhèt Chris Venditti, de l’Universitat de Reading – a d’autres animals coma los mamifèrs. La siuena evolucion, e la dels èssers umans, seriá, doncas, ligada al declin dels dinosaures e al nòstre senhorejament de la planeta uèi lo jorn”.

Christian Andreu