Home PALEONTOLOGIA FAMILHA ANCIANA DELS CROCODRILS
FAMILHA ANCIANA DELS CROCODRILS
0

FAMILHA ANCIANA DELS CROCODRILS

0

Un rèptil ancian de la familha dels crocodrils, que visquèt ara fa 212 milions d’annadas es estat descobèrt al Nòu Mexic e apelat amb lo nom d’una espècia d’uèi lo jorn, Vivaron haydeni. L’estudi es estat dirigit per Emily Lessner de Kennet Square, Pennsylvania. Lo fòssil consistís en maissa, tròçes de cran e de maluc.

vivaron_haydeni_by_plastospleen-dai0kze-1
Vivaron haydeni èra un arcosaure carnivòr e fasiá entre 4 e 5,5m de long.

Après l’aver trobat a la Bòria del Fantauma (Ghost Ranch) en 2009, los òsses foguèron gardats dins de caissas fins 2014. Aquela scientifica comencèt l’estudi e ara es estat publicat dins lo jornal numeric PeerJ. Lessner voliá trobar un estudi pro interessant per ajudar la Paleobiologia, e lo trobèt. Per començar, netejèt los fossils dins lo laboratòri e comencèt la sieuna rebastida. Lèu vejèt qu’aqueles òsses èran quicòm d’especial. Après divèrsas pròvas tomograficas, las sospèchas demorèron confirmadas.

Aital Vivaron es lo nom d’una sèrp de mai de 9 mètres de long que coneguda a Ghost Ranch dempuèi mai de 100 ans. Ara, lo nòu reptil descobèrt, la sièisena espècia de rauisuquid jamai trobada ne pòrta lo nom. Fa 212 milions d’ans la region del Sud-Oèst estatsunenca formava part de l’occident del supercontinent Pangèa. E èra un reptil qu’aparteniá de la familha anciana dels crocodrils.

Un arcosaure carnivòr

Vivaron haydeni èra un arcosaure carnivòr – un grop d’animals qu’inclutz dinosaures e crocodrilians mas tanben de mamifèrs. Fasiá entre 4 e 5,5m de long e marchava sus quatre patas.

“Foguèt benlèu un dels predators mai grands de l’epòca pr’amor que fòrça dinosaures èran mai pichons – çò diguèt Sterling Nesssbill, qu’a participat a l’estudi -. Cal rebrembar qu’aquesta epòca es lo Triassic, una epòca qu’èra plena de dinosaures. Aiçò per dire qu’èra l’epòca dels dinosaures”.

fig-9-1x
Vivaron haydeni visquèt ara fa 212 milions d’annadas al territòri qu’uèi es Nòu Mexic.

La maissa de Vivaron a de caracteristicas unicas e los paleològs espèran de trobar mai de rèstas d’aqueste reptil encara a Ghost Ranch.

“Seriá possible que d’autres òsses encara foguèsson enterrats en aqueste lòc – çò diguèt Lessner. Cal doncas contunhar la recerca pr’amor que parlam d’una espècia nòva mas tanben unica”.

La paleobiològa qu’a fach l’estudi soslinha que, de còps, un recercaire non pòt saber qu’a trobat una espècia nòva fins que l’estúdie dins lo laboratòri. La cèrca de detalhs fòrça petits als fossils balha, segon Lessner, una escasença unica per far d’estudis mai prigonds en paleontologia. E après arriba l’estonament.

La Redaccion