EXÒDE DE DINOSAURES PENDENT LO CRETACÈU
Una còla de paleontològs de la Universitat de Leeds, a Anglatèrra, a descobèrt un exòde que faguèron los dinosaures dempuèi Euròpa entre fa 146 e 100 milions d’ans. L’estudi a estat fach en tot utilizar la Teoria del Malhum, una tecnica fòrça utilizada en informatica per comprene melhor las donadas. Ara es estada utilizada per primièr còp en recèrca biologica e es lo primièr estudi scientific jamai fach sus los dinosaures amb aquesta tecnica.
L’estudi, qu’a coma cap Alexander Dunhill, de la Universitat de Leeds, confirma d’autres estudis que ja èran estats fachs sus los dinosaures que provavan la migracion contunha d’aquestes animals dempuèi Euròpa dinc a d’autres continents un còp lo supercontinent Pangèa se trinquèt en divèrsas massas de tèrra desseparadas pels oceans.
“Pensem que i aguèron temporalament pònts de tèrra entre los desparièrs continents – çò diguèt Alexander Dunhill -. Mas imaginar estructuras coma aquestas demest tèrras coma India-Madagascar e Austràlia es malaisit de far”.
Un exòde de milions d’annadas
Mas tanben confirman qu’aquestes pònts de tèrra entre continents durèron millions d’annadas e qu’aquò es un fach totalament possible. Per far aqueste estudi an utilizat las donadas de Paleobiologia de tota la planeta (Paleobiology Database) qu’an tota la documentacion sus totes los dinosaures descobèrts fins a uèi lo jorn en la Tèrra.
Amb aquestas donadas an realizat una mapa en divèrsas epòcas que confirma ont èran totas las espècias e an pogut descobrir se los dinosaures emigrèron o non e en quina direccion o faguèron. E aquò pr’amor que maugrat que i a regions amb plan pauca informacion sus los dinosaures, d’autres, coma Euròpa n’an e fòrça.
La descobèrta es estat publicada en la revista Journal of Biogeography, e confirma la teoria que, maugrat que i aguèt una trincament de tèrras pendent lo Cretacèu, i aguèt tanben una emigracion d’aquelas bèstias pr’amor que’ls pònts de tèrra pendent lo Cretacèu Ancian, existiguèron pendent millions d’ans. Mas perqué o faguèron es una question que’ls scientifics encara non sabon cossí respondre.
Christian Andreu
