Estudiar que que siá pendent de long temps ajuda arrestar l’aparicion de malautiás mentalas coma l’Alzheimer. La causa ne seriá la creacion de reservas cognitivas dins lo cervèl qu’ajudan arrestar plan la naissença de deméncias. Aquò arribèt aprés se saber qu’en 2050 mai de 131 milions de personas dins la planeta patiràn de deméncias.
Uèi ne son solament 50 milions. E aquò vòl dire que i aurà gaireben 3 per cada malaut mental que i a uèi lo jorn. Totun, la prevencion, segon afirman de nòus estudis, ajudarà plan poder arrestar l’aparicion d’aquel biais de malautiás. E far de longs estudis ajudarà de segur, dison ara los cercaires scientifics.
De longs estudis ajudaran crear un melhor capital cognitiu per arrestar l’arribada d’aquel tipe de malautiás. Es la conclusion d’un nòu estudi publicat ara per l’Insern al numeric American Journal of Epidemiology. Segon l’estudi, los longs estudis que i a agut los darrièrs ans dins la populacion aurián provocat una demenisson d’aqueste tipe de malautiás. Maugrat aquò, un mai long espèr de vida farà pr’aquò créisser lo nombre de personas qu’auràn lèu pus malautiás mentalas.
Mai malauts d’Alzheimer
Segon l’Insern, en 2050 al Mond, i aurà mai de 131 milions de personas que patiràn de malautiás mentalas e d’aquelas 3/4 patiràn d’Alzheimer. Es totalament necessari doncas segon aqueste vejaire scientific de trabalhar la prevencion de las deméncias. Una manièra d’o far es estudiar pendent de long temps.
L’Insern confirmèt que de malautiás coma la diabetes, l’ipertension o encara de biais de vida mens sans pòdon provocar l’aparicion de deméncias divèrsas (sindròmes cronics que provòcan l’alteracion de las foncions cognitivas, coma la memòria, la rason, l’orientacion, la compreneson, la parla o lo judici).
Per arribar ad aquela conclusion, una còla de cercaires franceses restaquèt 1425 personas amb una edat entre 78 e 88 ans. Foguèron desseparats en dos grops: lo primièr nascut fins l’an 1912 e lo segond fins 1922. E estudièron lor coneissença globala, lor fluiditat verbala, lor memòria, autonomia e velocitat per reagir. La segonda generacion aguèt de melhors resultas (31,4% avián de diplòmas contra 18,2% de la primièra). Aquò voliá dire una educacion pus nauta qu’ajudava melhor de luchar contra las deméncias qu’apareisson amb l’edat.
Segon los cercaires aquò poiriá explicar perqué la segonda generacion èra mai autonòma que la primièra. “Trabalhar amb lo telefòn o d’autres espleches creèt una capacitat cognitiva mai granda – çò diguèron los autors de l’estudi”. Los nascuts aprés, pr’amor d’una màger educacion avián una màger fluiditat verbala e memòria.
“Los beneficis de l’educacion sus lo cervèl son estonants – çò diguèt Leslie Grasset -. Los qu’an estudiat pus ans una reserva cognitiva màger e aquò permet arrestar melhor l’aparicion de cèrtas malautiás mentalas, pr’amor d’una melhor autonomia e capacitat cognitiva”.
La redaccion
