Home SCIÉNCIA ES TROBADA MAI DE MATÈRIA ORGANICA SUS CERES
ES TROBADA MAI DE MATÈRIA ORGANICA SUS CERES
0

ES TROBADA MAI DE MATÈRIA ORGANICA SUS CERES

0

Las donadas ja èran ailà. Las aviá fa de temps la NASA. Mas ara una nòva analisi d’aquelas dóna de nòvas conclusions estonantas: una autra planeta del sistèma solar poiriá aver de matèria organica sus sa superfícia. La planeta es la planeta nana Ceres e las resultas del nòu estudi confirman que i a de matèria organica dins sa superfícia. E que n’i a plan.

Quina es l’origina d’aquela matèria organica que i a sus Ceres ?

La conclusion finala d’aqueste nòu estudi fa pensar. Benlèu i a mai de matèria orgànica en divèrsas planetas del nòstre sistèma e fins ara la tecnologia o aviá pas trobat. O benlèu las resultas de nòvas analisis solament confirman çò que ja se sabiá e qu’es estat amagat fins ara. Cossí que siá, ara de fònts oficialas de la bioastronomia – l’estudi e la cerca de vida a l’espaci – confirman que Ceres atanben poiriá aver de vida (bacteriologica?) o pas dins sa superfícia. Una planeta mai.

La matèria organica qu’es estada encontrada ara a Ceres es facha de moleculas organicas que serián clau per la tròba de vida. Aquò vòl pas dire qu’es estada trobada de vida en aquela planeta nana . Solament que sens aquela matèria organica i a pas de vida. E ja se sabia qu’a Ceres – la soleta planeta nana situada dins la cencha d’asteroïdes- èra estat trobat de glaç e aquò tanplan es de besonh a l’ora de cercar de vida extraterrèstra.

La trobalha a balhat als cercaires de l’espaci nòvas escasenças per trobar de vida en defòra de la planeta Tèrra. Amb d’aiga e amb fòrça matèria organica Ceres es ara un nòu candidat a aver de vida. La descobèrta es estada realitzada amb l’ajuda d’un espectomètre d’infraroges de vision (VIR).

La cerca de moleculas organicas

Las moleculas trobadas foguèron encontradas a la region d’Ernutet, un cratèr situat a l’emisferi nòrd de Ceres. Per las confirmar los cercaires volguèron las restacar amb de material divèrs de la Tèrra. Una primièra analisi donèt de chifras plaçadas entre 6% e 10% de matèria organica dins la superfícia d’aquela planeta.

Totun, aquelas chifras foguèron pas consideradas definitivas. La cercaire Hannah Kaplan, de l’Institut de Recèrca del Sud-Oèst ne volguèt far una autra, d’analisi. Restaquèt las donadas amb de matèria organica trobada sus de meteòrs. E las chifras creissèron. Aquò voliá dire que sus Ceres i aviá de matèria organica. E fòrça.

Una autra planeta del sistèma solar poiriá aver de matèria organica sus sa superfícia.

“En tot comparar las donadas qu’aviam sus Ceres e de matèria organica extraterrèstra – çò diguèt Kaplan – poguèt èsser confirmat que òc, que n’i aviá e plan. Segon la nòva analisi i a fins 40%-50% de matèria organica sus Ceres. E aquò son de resultas estonantas”.

Ara aquelas chifras an fach sorgir de nòvas questions scientificas: quina es l’origina d’aquela matèria organica que i a sus Ceres ? Pel moment, los cercaires trabalhan sus doas ipotèsis: l’origina proven d’un meteòr e tombèt dempuèi l’espaci exterior o foguèt producha dins de Ceres e puèi sortiguèt a la superfícia d’aquela planeta nana.

Mas de concentracions tan nautas de matèria organica a la superfícia d’una planeta nana coma Ceres solament poirián èsser explicadas per una cometa puslèu qu’un meteòr. Cossí que siá la NASA a confirmat ara que dins lo sistèma solar ja i a una autra planeta que poiriá aver (o pas) de vida.

La Redaccion

Christian Andreu Nasquèt a Barcelona en 1972, estudièt jornalisme a l’Universitat Autonòma de Barcelona e son especialitat es la politica internacionala. Parla uech lengas dont l'occitan. A publicat lo libre Art i Lletres a Horta-Guinardó e a collaborat totjorn amb de jornals catalans, bascos e occitans coma La Veu del carrer, El Punt, Egin, A vòste e Jornalet. Es maridat, a dos enfants, Jana e Roger, e demòra a Reus.

LEAVE YOUR COMMENT

L'adreça electrònica no es publicarà. Els camps necessaris estan marcats amb *