Home DIVÈRSES D’UMANS E D’AUCÈLS ELEFANT
D’UMANS E D’AUCÈLS ELEFANT
0

D’UMANS E D’AUCÈLS ELEFANT

0

Divèrses òsses trobats a Christmas River dins lo sud de l’illa de Madagascar confirmèron doas causas: que l’òme i arribèt fòrça abans çò que se pensava, e que visquèt pendent de milièrs d’annadas amb d’aucèls elefants que pesavan mai de 500 kg. Lor escantiment aguèt luòc fa solament 1000 ans.

D’umans e d’aucèls elefants visquèron amassa pendent mai de 9000 ans.

Los òsses d’aucèl elefant (espècias d’Aepyornis e Mullerornis) foguèron trobats en 2009 dins un terren fòrça ric en òsses ancians d’animals. Segon los cercaires que los trobèron, lo luòc poiriá èsser estat un luòc confirmat per caçar e tuar aqueles e d’autres animals (d’ipopotams e de tartugas gigantas mas tanben de lemurs gigants, entre d’autres).

Totun, los òsses èran estats trabalhats per la nòstra espècia. La datacion facha amb la tecnica del radiocarbòni balhèt una data de 6000 ans anteriora a çò que se pensava fins ara a prepaus de l’arribada d’umans a Madagascar. Aquò farà rescriure la preïstòria d’aquela illa.

Segon un nòu estudi fach per la Societat Zoologica de Londres, l’analisi dels òsses ajudèt a descobrir qu’èran d’aucèl elefant e que portavan de marcas fachas per de caçaires preïstorics. Mas aquò se passèt fa 10 500 ans. Aquesta es doncas la nòva data d’arribada dels primièrs umans dins aquela illa e non pas fa 2400 ans, coma se pensava fins uèi lo jorn.

Los òsses, a mai, parlan d’un long periòde ont Madagascar visquèt a coexistir d’umans e una megafauna coma los aucèls elefants, e que durèt de milièrs d’annadas. Mas aquela primièra populacion qu’arribèt alavetz se tròba pas dins la genetica de la populacion de l’illa actuala. Quina foguèt aquela misteriosa populacion qu’apuèi s’escantiguèt ?

”Solide que la megafauna de Madagascar –d’aucèls, de lemurs e de tartugas gigantas en mai d’ipopotams– s’escantiguèt a Madagascar fa solament 1000 ans –çò confirmèt James Hansford, autor de l’estudi dels òsses–. De saber perqué i aguèt alara aquel escantiment après de milièrs d’ans de coexisténcia entre aquelas espècias e l’òme modèrne es encara un mistèri”.

Una arribada pus anciana

La megafauna de Madagascar –d’aucèls, de lemurs e de tartugas gigantas en mai d’ipopotams– s’escantiguèt a Madagascar fa solament 1000 ans.

“Cal cercar encara mai per descobrir quina foguèt la causa d’aquel escantiment fa mens de 1000 ans –çò contunhèt Hansford–. D’umans e d’aucèls elefants visquèron amassa pendent mai de 9000 ans e cal descobrir encara quina foguèt la causa d’aquel cambiament negatiu dins la biodiversitat de l’epòca qu’entraïnèt aquel escantiment après de sègles de coexistència entre espècias”.

A mai, Patricia Wright, de l’Universitat d’Stony Brook, confirmèt que la nòva descobèrta ajudariá a comprene quora arribèron los primièrs umans dins l’illa mas que caliá, totun, far encara mai de recèrcas arqueologicas pr’amor qu’an pas trobat de traças geneticas d’aquela populacion preïstorica dins la populacion modèrna de Madagascar. “Qui foguèron aqueles òmes e perqué s’escantiguèron ?”, çò se demandèt Wright.

L’estudi que demòstra quand arribèron los primièrs òmes modèrnes dins aquela illa pr’amor dels signes dels òsses d’aucèl elefant, la publiquèron dins la revista numerica Science Advances.

La Redaccion

Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion

Christian Andreu Nasquèt a Barcelona en 1972, estudièt jornalisme a l’Universitat Autonòma de Barcelona e son especialitat es la politica internacionala. Parla uech lengas dont l'occitan. A publicat lo libre Art i Lletres a Horta-Guinardó e a collaborat totjorn amb de jornals catalans, bascos e occitans coma La Veu del carrer, El Punt, Egin, A vòste e Jornalet. Es maridat, a dos enfants, Jana e Roger, e demòra a Reus.

LEAVE YOUR COMMENT

L'adreça electrònica no es publicarà. Els camps necessaris estan marcats amb *