CREACION DE PÈL ARTIFICIALA
Lo camin fins a l’umanoide o robòt semblable a l’òme finís pas jamai. Avèm cada jorn l’escasença de poder veire la creacion de tròces d’umanitat que lèu seràn amassats en un èsser benlèu superior a nosautres, paures umans. Coma dins un filme de sciéncia-ficcion, ara al Japon an pogut crear de pèl flexibla, coma la pèl umana.
Aquò es estat fach per una còla de scientifics de la Universitat de Tòquio amb Takao Someya coma cap. An desvolopat una e-pèl ultraflexibla e an pogut demostrar lo sieu foncionament a travèrs d’un diòde de lutz organica. La tòca es de poder integrar d’engenhs electronics al còrs uman en aplicacions biomedicalas.
Assajar de far una pèça electronica coma aquesta èra pas aisit e ja èra estat fach abans. Mas per poder far una bona pèl coma la pèl umana, aquesta deu èsser prima e flexibla e fins ara lo resultat èra pas estat bon. La nòva pèl facha per l’equipa de Takao Someya, a pogut crear una pèl ultraprima e ultraflexibla amb solament doas micras d’espessor.
Un material organic e non inorganic
Per far aquela pèl artificiala, l’equipa de scientifics japoneses a amassat de material organic coma lo parilèn e material pas organic coma la silicòna oxinitritada. Amb tot aquò poguèron far una e-pèl plegadissa que se copa pas.
De mai, an creat tanben de diòdes qu’emeton lude lutz e de fotodetectors organics que trabalhan amassa amb aquela pèl. Aquesta es ja poguda èsser implantada en d’umans e provada. E aquo es estat un succès pr’amor que respond a totes los movements umans coma se foguèsse de pèl vertadièra. L’estudi es estat publicat dins la revista Science Advances.
Christian Andreu
