Dempuèi la descobèrta en 2003 d’una nòva espècia d’ominid apelada Homo floresiensis –que mesurava solament 1 mètre– en la balma indonesiana de Liang Bua, dins l’illa de Flores, la comunautat scientifica a discutit las rasons de son extincion. Ara, un nòu estudi ditz qu’aquò se debanèt fa 50 000 ans en causa de l’intrada de nòstra espècia dins l’illa. Aquò provoquèt son extincion.
Segon lo nòu estudi publicat dins la revista Nature, totas doas espècias aurián luchat entre elas per la noiridura e aquò auriá provocat l’extincion d’Homo floresiensis. La data de son extincion tanben auriá d’èsser cambiada pr’amor que fins a uèi lo jorn se disiá qu’aquesta se debanèt fa solament 11 000 ans. Lo nòu estudi ditz que foguèt fòrça mai anciana.
Los dobtes comencèron quand se pensèt que fa 11 000 ans l’òme modèrne ja aviá colonizat totalament lo Sud-Èst asiatic. E aquò daissariá pas pro d’escasenças de subrevivéncia a l’Obit. De mai, la coexisténcia d’aqueste amb nòstra espècia seriá tanben dobtosa.
Segon lo nòu estudi, l’extincion d’Homo floresiensis se seriá debanada longtemps abans, entre fa 50 000 e 46 000 ans –la darrièra esqueleta trobada d’un Obit a precisament 46 000 ans–, pr’amor de l’intrada d’Homo sapiens en Asia del Sud-Èst e Austràlia.
Conéisser la data de l’arribada de nòstra espècia dins aquela region de la planeta –ont tanben i avián alavetz doas espècias de mai dins lo luòc, Homo erectus e Homo floresiensis– provoquèt una autra question: l’arribada de l’òme modèrn, foguèt la causa de l’extincion de l’Obit ? Mas se foguèt aital, caliá aver de pròvas. E aquò es estat çò qu’a cercat la còla de scientifics qu’a fach lo nòu estudi.
Aquò pòt pas èsser una coïncidéncia
Çò afirman los cercaires qu’an participat a l’estudi e qu’an presentat sas conclusions fa gaire al congrès de la Societat Europèa per l’Estudi de l’Evolucion Umana, a Madrid. D’en primièr cal soslinhar que la coexisténcia de nòstra espècia amb d’autras –coma Neandertal– provoquèt son extincion –e mai s’ara ja se sap qu’Homo sapiens sapiens e Neandertal demorèron amassa fins a 50 000 annadas–.
Dins la cauna de Liang Bua s’es trobat de dents mai grandas que las de l’espècia . Aquò voliá dire que l’òme modèrne visquèt a l’epòca de l’Obit. Mas quant de temps ?
La còla de l’estudi, amb Richard Roberts, de l’Universitat de Wollongong, en Austràlia, confirma que nòstra espècia foguèt una causa dirècta de l’extincion d’Homo floresiensis. Tanben, e mai i aja pas unanimitat scientifica per creire qu’aquestas dents pòscan èsser d’umans modèrnes –qualques unes pensan que poirián èsser d’Homo sapiens o tanben d’Homo erectus pr’amor que son fòrça primitivas –, Roberts e sos collègas dison que lo fach es clar.
D’autras pròvas serián l’extincion a aquela meteissa epòca d’animals coma la cigonha giganta, de l’estegodont (de la familha anciana dels elefants) e dels voltors, que van pas mai luènh que los depauses de 46 000 ans. L’arribada d’Homo sapiens provoquèt una lucha per la subrevivéncia que finiguèt que tuèt l’Obit.
De mai, suls depauses de las caunas comencèt a se trobar de mollusques d’aiga dolça, coma en d’autres luòcs e sits d’Africa e Eurasia. Una pròva de mai que la nòstra espècia seriá arribada, puèi auriá provocat d’extincions massissas e un cambiament d’alimentacion. Los espleches de pèira trobats son desparièrs d’aqueles faches per Homo floresiensis.
“Sabèm pas encara se la coexisténcia entre las doas espècias foguèt longa – çò diguèt Chris Stringer, del Musèu d’Istòria Naturala de Londres–. Mas sabèm que l’arribada de l’òme modèrne foguèt una causa clara de l’extincion de l’Obit. Aquò es clar”.
La prima venenta, la còla qu’a realizat l’estudi vòl tornar a la cauna de Liang Bua per far mai de recèrcas. Cal ara estudiar los depauses qu’an entre 50 000 e 46 000 ans per trobar de pròvas definitivas.
S’aquò se debanèsse, se poiriá demostrar qu’Homo sapiens foguèt la causa mai dirècta de l’extincion d’Homo neanderthalensis en Euròpa e d’Homo erectus e Homo floresiensis en Asia. Un legat mai qu’inquietant.
La Redaccion
Aqueste article serà tanben publicat dins Jornalet , lo primièr quotidian en linha de lenga occitana, amb lo qual Sapiéncia a un acòrdi de cooperacion.
