Canadà, après Uruguai, serà lo segond país de la planeta que legaliza l’usatge de la marihuana per de fins recreativas. La votacion se faguèt aquesta setmana al Senat canadian e la lei foguèt aprovada per 52 vòtes en favor e 29 contra. La venda de marihuana serà doncas legala en Canadà abans la fin de l’an.
Amb aquesta nòva lei, Canadà vòl intrar lèu dins lo comèrci mondial de la marihuana. Es lo primièr estat del dich grop dels 7 (G7) o païses mai industrialitzats, qu’anarà delà l’usatge de la marihuana per de fins medicalas. La lei pòrta lo nom C-45 mas es mai coneguda coma Lei del Cannabis e es la resulta de la promessa electorala del primièr ministre canadian Justin Trudeau a sos votaires.
La prevision es ara d’aplicar la nòva lei a las províncias e territòris, qu’auràn d’adaptar lors leis localas per poder permetre la dobertura de botigas estatalas dedicadas a sa venda abans la fin de l’an. E las províncias an ja avisat qu’an de besonh d’un periòde d’entre 8 e 12 setmanas per s’i adaptar.
Una promessa electorala
“Es estat pro aisit per nòstres joves d’aver de marihuana –çò diguèt Trudeau a Twitter– e per los criminals de far de beneficis. Ara Canadà vòl cambiar tot aquò. La nòva lei ja es estada aprovada al Senat canadian”. A mai, lo ministre de la justícia, Jody Wilson-Rayboult se mostrèt content de la nòva lei: “Es un eveniment istoric dins la politica de progrès de Canadà – çò afirmèt tanben sus Twitter–. La nòva lei protegirà los joves pr’amor que serà balhada mai d’informacion sus los risques del cannabis e, de mai, los criminals ganharàn pas pus res. Ara o ganharàn los canadians a travèrs de l’estat”.
La nòva Lei del Cannabis canadiana permetrà als adultes de portar amb eles fins a 30 gr de marihuana legala en public. Tanben serà permesa la cultura de fins a quatre plantas d’aquela espècia dins los ostals e de cosinar d’aliments amb de marihuana per lo consum pròpri, mas demorarà una lei fòrça estricta que secutarà l’obtencion illegala de marihuana.
Los consumaires auràn de comprar de marihuana dins de botigas administradas per las províncias e los territòris canadians. E se n’i a pas, de negòcis amb una licéncia federala. E la marihuana serà pas venduda dins de magazins ont se pòt comprar d’aloòl o de tabac. En mai d’aquò, ara cal cambiar las leis sus la conducha de veïculs per las adaptar a l’influéncia del cannabis.
L’edat minimala per comprar de marihuana serà de 18 ans, e produire, distribuir o vendre de cannabis a de menors serà totalament enebit. Segon d’estimacions estatalas, la nòva lei canadiana del cannabis portarà mai d’un miliard de dolars a l’estat.
A l’ora d’ara, en mai de Canadà, i a ja nòu estats dels Estats Units e pereu lo Districte de Colúmbia ont es legal lo consum de marihuana. E dempuèi junh de 2018 tanplan Canadà.
Christian Andreu
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
