Home DIVÈRSES CAL UN CAMBIAMENT DE DIÈTA (E MONDIAL)
CAL UN CAMBIAMENT DE DIÈTA (E MONDIAL)
0

CAL UN CAMBIAMENT DE DIÈTA (E MONDIAL)

0

La sciéncia, de còps, pòt tanben èsser utilizada per melhorar la lucha contra lo cambiament environamental e la santat de las personas. Aquò es la resulta d’un nòu estudi scientific que demanda un cambiament global dins la dièta dels umans de la planeta tota se volèm subreviure en 2050. La solucion seriá de manjar fòrça mens de carn.

L’impacte environamental del sistèma alimentari mondial actual creisserà d’un 50 a un 90% en 2050 en causa de la dièta rica en carn.

Una dièta vegetala, fòrça mai sana, es çò que prepausan los cercaires d’aquesta còla internacionala. Aital se pòt reduire la pèrda d’aiga al nivèl mondial. A mai, cal tanplan melhorar las practicas agricòlas amb de nòvas tecnologias ja emplegadas en plusors païses de la planeta. Mas aquel cambiament, lo cal far al nivèl planetari. En 2050, la populacion de la Tèrra arribarà als 10 miliards de personas e l’avenir de l’umanitat, çò dison aqueles scientifics, serà en perilh.

Lo primièr estudi qu’analisa tot aquò

L’estudi es ja conegut coma lo primièr que mesura cossí la produccion actuala de manjar, e sustot, lo consum planetari es prèp de rompre los limits mondials pr’amor de sas caracteristicas. Cal començar lèu, çò diguèron los cercaires, un camin viable per la subrevivéncia umana abans que siá tròp tard.

“Avèm volgut soslinhar que divèrsas solucions amassa pòdon far venir possible de noirir l’umanitat malgrat son nombre –çò diguèt Marco Springmann, del Programa sus lo Futur de l’Alimentacion de l’Escòla Martin d’Oxford–. Sens cap d’aquelas accions, l’impacte environamental del sistèma alimentari mondial actual creisserà d’un 50 a un 90% en 2050. E tot aquò vendrà en causa de la dièta rica en graisses, sucre e carn. L’umanitat aurà alavetz de besonh de dos còps mai de noiridura qu’ara”.

L’estudi amassèt doncas mai d’una solucion globala que, a l’encòp, poirián melhorar la produccion de manjar sus la Tèrra. Segon aquel estudi, cal cambiar de dièta e la rendre mai vegetariana mas al nivèl mondial. Amb aquò, çò dison, las emissions de gases d’efièch de sèrra se poirián reduire d’un 50%, e l’utilizacion de fertilizants e d’aiga d’un 25%.

Una dièta vegetala, fòrça mai sana, es çò que prepausan los cercaires d’aquesta còla internacionala.

Al delà d’aquò, l’estudi soslinhèt que cal introduire las nòvas tecnologias dins l’agricultura a l’encòp dins totas las regions de la planeta per demesir la pression de mai de tèrra, d’aiga e de fertilizants que la patís la planeta uèi lo jorn. Fin finala, cal reduire la pèrda de manjar e d’aiga actuala e aquò se pòt arribar de far amb de nòvas tecnologias fins a un 16%.

“Las solucions prepausadas son ja estadas utilizadas dins cèrtas partidas del Mond –çò contunhèt Springmann–. Mas cal una politica globala de coordinacion mai prigonda per arribar a de melhoras resultas mai lèu”.

Aital, e segon aquel estudi, publicat dins la revista numerica Nature, cal realizar mai d’investiments en recèrca, encoratjar los agricultors e far de melhoras leis per qu’aquó siá possible. Una dièta mai vegetariana ne seriá una solucion. Mas sens responsa globala, çò alèrtan, en 2050 lo problèma serà ja de fòrça marrit adobar e l’umanitat tota serà en vertadièr perilh d’escantiment.

La redaccion

Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion

Christian Andreu Nasquèt a Barcelona en 1972, estudièt jornalisme a l’Universitat Autonòma de Barcelona e son especialitat es la politica internacionala. Parla uech lengas dont l'occitan. A publicat lo libre Art i Lletres a Horta-Guinardó e a collaborat totjorn amb de jornals catalans, bascos e occitans coma La Veu del carrer, El Punt, Egin, A vòste e Jornalet. Es maridat, a dos enfants, Jana e Roger, e demòra a Reus.

LEAVE YOUR COMMENT

L'adreça electrònica no es publicarà. Els camps necessaris estan marcats amb *