Home DIVÈRSES AVER D’ENFANTS FA VIURE MAI LONGTEMPS
AVER D’ENFANTS FA VIURE MAI LONGTEMPS
0

AVER D’ENFANTS FA VIURE MAI LONGTEMPS

0
0

Èsser paire o maire fa viure mai longtemps. Quand aquestes an 60 ans, la diferéncia amb d’òmes e femnas sens enfants pòt aténher dos ans de mai. Es la conclusion d’un nòu estudi fach per l’Institut Korolinska de Suècia e dirigit per Karin Modig.

L’origina de l’estudi es estada la volontat de Modig de sos collègas de conéisser s’aver de mainats reculava o non la data de la mòrt de las personas. Per ansin estudièron mai de 700 000 òmes e femnas amb una edat de 60 ans o mai. Las donadas estudiadas comprenián s’èran maridats o pas, e s’avián d’enfants.

L’estudi confirmariá que los deficits vitals que los patisson las personas qu’an pas agut de mainats son mai grands que en d’autras personas.

Puèi calculèron la data possibla de mòrt de totas aquelas personas e comparèron las qu’avián de mainatges e las que n’avián pas. E malgrat tot, la possibla data finala de la mòrt reculava per las personas qu’avián d’enfants. De factors coma l’educacion èran importants, de segur, mas mai encara o èra aver de descendents o non.

Aital, un òme qu’aviá un mainat aviá un 7,4% d’escasenças de morir. E un òme de la meteissa edat qu’aviá pas d’enfants aviá un taus mai naut de mortalitat: un 8,3%. Çò que vòl dire qu’aver almens un mainat es bon per la santat de las femnas e dels òmes, çò diguèron los scientifics qu’an realizat aquel estudi.

De diferéncias mai grandas amb l’edat

Totun, la desparitat entre las personas qu’avián d’enfants e las que n’avián pas èra mai pichona a l’edat de 60 ans. E los òmes qu’avián aquela edat e èran pas maridats avián un 1,2% d’escasenças de mai de morir. Los qu’èran maridats, de lor costat, avián solament un 0,6% d’escasenças de morir, çò es mens de la mitat.

Segon l’estudi, la possibla data finala de la mòrt reculava per las personas qu’avián d’enfants.

Malgrat d’estudis anteriors que confirmavan que çò d’important en la data de la mòrt de las personas èra lo sèxe dels mainats, la còla qu’a realizat aquel nòu estudi a volgut soslinhar qu’aquò es pas vertat e qu’es pas important d’aver de filhs o de filhas. Çò de mai important, çò diguèron, es d’aver d’enfants e pro.

L’estudi, publicat dins la revista numerica Journal of Epidemiology&Community Health a volgut confirmar, dins sas conclusions, que los deficits vitals que los patisson las personas qu’an pas agut de mainats son mai grands que en d’autras personas. Es un ponch scientific que los cercaires an volgut mostrar tre lo començament de l’estudi.

“Nòstra descobèrta es mai evidenta quand las personas son mai vièlhas”. Aquò poiriá èsser pr’amor que, çò soslinhèron los scientifics, “las personas qu’an pas d’enfants an de deficits d’ajuda mai grands que los autres”. Una conclusion uèi lo jorn encara estonanta.

La Redaccion

Aqueste article serà tanben publicat dins Jornalet , lo primièr quotidian en linha de lenga occitana, amb lo qual Sapiéncia a un acòrdi de cooperacion.

LEAVE YOUR COMMENT

L'adreça electrònica no es publicarà. Els camps necessaris estan marcats amb *